އަވައްޓެރި ސްރީލަންކާގެ މޫސުން އިންތިހާއަށް ގޯސްވެ، ކުރަމުންދާ ވިއްސާރައާއި ގުޅިގެން ފެންބޮޑުވުމުގެ ސަބަބުން މިހާތަނަށް 16 މީހުން މަރުވެފައިވާ ކަމަށް ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނެފިއެވެ.

ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނީ މީގެތެރެއިން ގިނަ ބަޔަކު މަރުވެފައިވަނީ ގެނބިގެން ކަމަށެވެ. އެގޮތުން ގެނބިގެން 9 މީހުން ވަނީ މަރުވެފައިވާ ކަމަށް ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނެފައި ވެއެވެ. މީގެއިތުރުން ބިންގަނޑު ކަނޑައިގެން ގޮސްގެން މަރުވެފައިވަނީ 4 މީހުންކަމަށް އެ ސެންޓަރުން ބުނެއެވެ. އަދި ހޮނު އެޅުމުގެ ސަބަބުން 2 މީހުން މަރުވެފައިވާއިރު، 5 މީހަކަށް އެކިވަރުގެ އަނިޔާތައް ލިބި، މީހަކު ގެއްލިގެން ރިޕޯޓްކޮށް ފައިވާކަމަށްވެސް ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނެއެވެ.

މޫސުމް ގޯސްވުމާއި ގުޅިގެން ހިނގާފައިވާ ހާދިސާތަކުގެ ސަބަބުން 5،000 އަށް ވުރެ ގިނަ މީހުން ރައްކާތެރި އެހެން ސަރަހައްދު ތަކަށް ބަދަލުކުރަން ޖެހުނު ކަމަށް ވެސް ރަސްމީ އިދާރާތަކުން ބުނެފައި ވެއެވެ. އޭގެ ތެރެއިން އެއްބަޔަކު ގާތްތިމާގެ މީހުންގެ ގޭގެއަށާއި، އަނެއްބަޔަކު ސަރުކާރުން ހިންގާ ރިލީފް ސެންޓަރުތަކަށް ބަދަލުކުރެވިފައިވާ ކަމަށް ލަންކާގެ ޑިޒާސްޓާ މެނޭޖްމަންޓް ސެންޓަރުން ބުނެއެވެ.

ލަންކާގެ މޫސުމާ ބެހޭ ގައުމީ އިދާރާއިން ލަފާކުރާ ގޮތުގައި އުތުރާއި ހުޅަނގު އުތުރު އަދި ހުޅަނގުގެ ޕްރޮވިންސް ތަކުގެ ބައެއް ހިސާބުތަކަށް 100 މިލިމީޓަރަށް ވުރެ ބޯކޮށް ވާރޭ ވެހޭނެ ކަމަށެވެ. އަދި ލަންކާގެ ބައެއް ސަރަހައްދުތަކަށް 40އާއި 50 ކިލޯމީޓަރާއި ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވޭ ކަމަށް ބުނެފައިވެއެވެ.

އާންމު ގޮތެއްގައި އޮކްޓޯބަރު މަހާއި ނޮވެމްބަރު މަހަކީ ސްރީލަންކާއަށް މޫސުމީ ވިއްސާރަ ކުރާ ދުވަސްވަރެކެވެ. ނަމަވެސް މިއަހަރު ލަންކާގެ ގިނަ ސަރަހައްދުތަކަށް އާދަޔާ ހިލާފަށް ވާރޭ ވެހިފައިވާކަމަށް ރިޕޯޓްތައް ބުނެއެވެ.