ލިބިޔާގެ ކުރީގެ ރައީސް ކާނަލް މުއަމަރުލް ގައްޒާފީގެ ދަރިކަލުން, ސައިފް އަލް އިސްލާމް ގައްޒާފީ، ލީބިއާގެ ރައީސްކަމަށް ކުރިމަތިލާނެކަން އިއުލާން ކުރައްވައިފިއެވެ.

އެގޮތުން ސައިފް އަލް އިސްލާމް ގައްޒާފީ މި އަހަރުގެ އިންތިހާބުގައި ވާދަކުރައްވާނެކަން އަމިއްލަފުޅަށް އިއުލާންކުރަށްވާފައިވާއިރު، އެ ގައުމުގެ އިލެކްޝަންސް ކޮމިޝަނުން ވަނީ ސައިފްގެ ކެންޑިޑެސީ ކޮމިޝަނަށް ހުށަހެޅިކަން ކަށަވަރު ކޮށްދީފައެވެ.

ސައިފްގެ އިތުރުން އިންތިހާބުގައި ވާދަކުރައްވާ ބޭފުޅުންގެ ތެރޭގައި ލީބިއާގެ އިރުމަތީގެ ސަރަހައްދުތައް ކޮންޓްރޯލް ކުރާ ހަނގުރާމަވެރިންގެ ކޮމާންޑަރު ހަލީފާ ހަފްތަރާއި ބޮޑުވަޒީރު އަބްދުލް ހަމީދު ދެބައިހް އަދި ގާނޫނު ހަދާ މަޖިލީހުގެ ރައީސް އަގުއިލާ ސަލާހް ހިމެނެއެވެ.

ލިބިޔާގެ ރިޔާސީ އިންތިހާބު ބާއްވަން ތާވަލް ކޮށްފައި ވަނީ ޑިސެމްބަރ މަހުގެ 24 ވަނަ ދުވަހުއެވެ. ނަމަވެސް އެގައުމުގެ ހާލަތު އޮތް ގޮތުން އަދިވެސް އިންތިހާބު ތާވަލާއި އެއްގޮތައް ބޭއްވިދާނެ ކަމާމެދު ސުވާލު އުފެދޭކަމަށް އެ ގައުމުގެ މީޑިއާތަކުން ދަނީ ބުނަމުންނެވެ.

ސައިފްގެ އިންތިހާބީ ލިޔުންތައް ހުށަހަޅަން ވަޑައިގެންނެވީ ލީބިއާގެ އާދަކާދައާއި ގުޅިފައިވާ ހެދުމެއް ކަމަށްވާ އަޅިކުލައިގެ ކުރުތާއެއްގައެވެ. ގައްޒާފީ ވެރިކަމުގައި ހުންނެވި އިރުވެސް އެންމެ ގިނައިން އޭނާ ތުރުކުރައްވައިގެން އުޅުއްވީ އަޅިކުލައިގެ މިފަދަ ކުރުތާއެކެވެ.

ސައިފަކީ ލީބިއާގެ ވެރިކަމަށް ގެންނަން ގައްޒާފީ ތަމްރީން ކުރަމުން ގެންދެވި ދަރިކަލުންނެވެ. ނަމަވެސް ގައްޒާފީގެ ވެރިކަމާއި ދެކޮޅަށް ލީބިއާގެ ރައްޔިތުން ނުކުމެ ކުރި މުޒާހަރާތައް އެންމެ ފަހުން ދާހިލީ ހަނގުރާމައަކަށް ބަދަލުވެ 2011 ވަނަ އަހަރު ވަނީ ގައްޒާފީ އަވަހާރަކޮށްލާފައެވެ. އަދި އެ ދުވަސްވަރު ސައިފް ވެސް ހައްޔަރު ކުރިއެވެ.