އަވައްޓެރި އިންޑިޔާގެ ނިއުދިއްލީގެ ވައި ތަޣައްޔަރުވުމުގެ ސަބަބުން ނިއުދިއްލީއާއި، އެ ސިޓީގެ ކައިރީގައި އޮންނަ ސިޓީތަކުގެ އޮފީސްތައް ބަންދުކޮށް ގޭގައި ތިބެގެން މަސައްކަތްކުރުމަށް އިންޑިޔާގެ ސުޕްރީމް ކޯޓުން އަމުރުކޮށްފިއެވެ.

ނިއުދިއްލީގެ ވައި ނުސާފުވުމާ ގުޅިގެން އޮފިޝަލުން ދަނީ އެކަން ހައްލުކުރުމުގެ މަސައްކަތްކުރަމުންނެވެ. އަދި މި މަހުގެ ކުރީކޮޅުން ފެށިގެން ނިއުދިއްލީގެ ވައި ނުސާފުވެފައިވާއިރު، މިކަމާ ގުޅިގެން ސްކޫލްތައް ވެސް ވަނީ ބަންދުކޮށްފައެވެ.

ނިއުދިއްލީގެ ވައި ތަޣައްޔަރުވުމާއި ގުޅިގެން އެ ސިޓީގައި ދިރިއުޅޭ ރައްޔިތުން ވަނީ ސުޕްރީމްކޯޓަށް ޕެޓިޝަނެއް ހުށަހަޅާފައެވެ. އެގޮތުން މި ޕެޓިޝަނާ ގުޅޭގޮތުން ފަހުބަސް އިއްވަވަމުން، ޖަޖުންގެ ޕެނަލްގެ ޗީފް ޖަސްޓިސް އެންވީ ރާމަންނާ ވަނީ، އިންޑިޔާގެ މައި ސިޓީ ހިމެނޭ ސަރަހައްދުގައި މިވަގުތުން ފެށިގެން ގޭގައި ތިބެގެން މަސައްކަތްކުރުމަށް އަންގާފައެވެ.

މީގެއިތުރުން ނިއުދިއްލީއާއި، ކައިރި ހިސާބުތަކުގެ ސްޓޭޓްތައް ކަމުގައިވާ ހަރްޔާނާ، ޕަންޖާބު އަދި އުއްތަރް ޕްރަދޭޝްގެ އެތައް ސަތޭކަ ދަނޑުވެރިންނެއް އެމީހުންގެ ދަނޑުތަކުގައި ރޯކޮށްފައިވާ އަލިފާންގަނޑު ވީހާވެސް އަވަހަކަށް ކޮންޓްރޯލްކޮށް ނިއްވުމަށް ކޯޓުން ވަނީ އަމުރުކޮށްފައެވެ.

ދަނޑުތަކުން ބާކީވާ ބައި އެންދުމަކީ އިންޑިޔާގެ ވައި ނުސާފުވުމަށް މެދުވެރިވާ މައިގަނޑު އެއް ސަބަބަށްވާއިރު، އެކަން ހުއްޓުވުމަށް މިހާތަނަށް ކުރި މަސައްކަތްތައް ވަނީ ނާކާމިޔާބުވެފައެވެ. އަދި މިކަން ހުއްޓުވުމަށް ފާއިތުވި ހަތަރު އަހަރު ވަނީ ބިލިއަނުން ޚަރަދުކޮށްފައެވެ.

މާހިރުން ބުނާގޮތުގައި ވައިގެ ކޮލިޓީގެ. މިންވަރު މިހާރު ހުރީ ވަރަށް ދަށް މިންވަރެއްގައި ކަމަށާއި، މިހާލަތުގައި ބޭރަށް ނިކުމެ ގިނަ ވަގުތު އުޅޭނަމަ ނޭވާލުމުގެ ނިޒާމަށް ޖެހޭ ބަލިތައް ޖެހުމުގެ ފުރުސަތު ބޮޑުކަމަށެވެ.