ރައީސް އިބްރާހިމް މުޙައްމަދު ޞާލިޙަކީ މޮޅު ރައީސެއް ކަމަށާއި، ތިން އަހަރުގެ މަސައްކަތް އެމަނިކުފާނު ކޮށްލީ ދޮޅު އަހަރުން ކަމަށް ފަތުރުވެރިކަމާބެހޭ ވަޒީރު އަދި ޖުމްހޫރީ ޕާޓީގެ މެންބަރު ޑރ. ޢަބްދުﷲ މައުސޫމް މިއަދު ވިދާޅުވެއްޖެއެވެ.

ރައީސް ޞާލިޙް ވެރިކަމުގެ ހުވާ ކުރެއްވިތާ އިއްޔެއަށް 3 އަހަރުވެފައިވާއިރު އެމަނިކުފާނުގެ 3 އަހަރުގެ ކާމިޔާބީއާ ގުޅޭގޮތުން ޑރ. މައުސޫމް ވިދާޅުވީ، ރައީސް އިބްރާހިމް މުޙައްމަދު ޞާލިޙަކީ މޮޅު ރައީސެއް ކަމަށާއި، އެމަނިކުފާނު ތިން އަހަރުގެ މަސައްކަތް ކޮށްލީ ދޮޅު އަހަރުން ކަމަށެވެ. ކޮވިޑް-19 ގެ ސަބަބުން ރައީސް ޞާލިޙްގެ ސިޔާސަތުތައް ތަންފީޒު ކުރެއްވުމުގައި ދޮޅު އަހަރު ގެއްލިގެން ދިޔަ ކަމުގައި ޑރ. މައުސޫމް ފާހަގަކުރެއްވިއެވެ. ޑރ. މައުސޫމް މިގޮތަށް ވިދާޅުވެފައި ވަނީ 2020 ވަނަ އަހަރު ފެށުނީއްސުރެ މިއަހަރުގެ މެދަކާއި ހަމައަށް ވެސް ކޯވިޑްގެ ސަބަބުން ގައުމުގެ ގިނަ ކަންކަން މުޅިން ހުއްޓި އިޤުތިޞާދީ ގޮތުން ވެސް ވަރަށް ބޮޑަށް އަޑިއަޅާލާފައިވާތީ އެކަމަށް އިޝާރާތް ކުރަށްވައެވެ.

ކޯވިޑް-19 ގެ ސަބަބުން ރާއްޖެއަށް އިޤްތިޞާދީ ގޮތުން އެންމެ ބޮޑު މަންފާއެއް ލިބޭ ފަތުރުވެރިކަން އެއްކޮށް ހުއްޓި 3 މަސްދުވަހަށް ރާއްޖޭގެ ބޯޑަރުތައްވެސް ބަންދު ކުރިއެވެ. ނަމަވެސް އަލުން ބޯޑަރު ހުޅުވައި ސަރުކާރާއި ފަތުރުވެރިކަމުގެ ސިނާޢަތުގައި ޙަރަކާތްތެރިވާ ފަރާތްތަކުގެ މަސައްކަތުން މިއަހަރު މިހާތަނަށް ރާއްޖެއަށް ވަނީ މިލިއަނަކަށްވުރެ ގިނަ ފަތުރުވެރިން ޒިޔާރަތް ކޮށްފައެވެ.

ތިންއަހަރުގެ މަސައްކަތް އަސްލު އެންމެ ދޮޅު އަހަރުން!
(ކޮވިޑު ކަސްތޮޅުގެ ދޮޅުއަހަރު ނުގުނޭނެތާ ދޯ! )
މޮޅެއް ނޫންތަ؟
ސާބަހޭ ރައީސް ޞާލިހު.#ޖަޒީރާތަރައްޤީ

— Abdulla Mausoom (@Mausoom_Maus) November 17, 2021

ސަރުކާރުން ލަފާކޮށްފައިވަނީ، މިއަހަރު 1.3 މިލިއަން ފަތުރުވެރިން ރާއްޖެ އަންނާނެކަމަށެވެ. މީގެއިތުރުން މިއަހަރުގެ ތެރޭގައި 10 މިލިއަނަށްވުރެ ބެޑް ނައިޓްސް އިތުރުވާނެކަމަށްވެސް ފަތުރުވެރިކަމުގެ ވުޒާރާއިން ވަނީ އަންދާޒާކޮށްފައެވެ.

ކޯވިޑާއި ގުޅިގެން ރާއްޖޭގެ ބޯޑަރުތައް 110 ދުވަހަށް ބަންދު ކުރުމަށް ފަހު އަލުން ހުޅުވީ މިދިޔަ އަހަރުގެ ޖުލައި މަހުގެ 15 ވަނަ ދުވަހުއެވެ. މިދިޔަ އަހަރު ނިމުނުއިރު ރާއްޖެއަށް އައިސްފައިވަނީ 555،494 ފަތުރުވެރިންނެވެ.