ސްޓެލްކޯގެ ސްޓެވޯ ޖަނަރޭޓަރާއެކު، ވ. ތިނަދޫ އައު އިންޖީނުގެއިން ހިދުމަތްދޭން ފަށައިފިއެވެ.

ސްޓެލްކޯއިން ބުނީ ސްޓެވޯ ވޯކްޝޮޕުން އެސެމްބަލްކުރި، ޖަނަރޭޓަރުތަކުގެ ތެރެއިން STW500 މޮޑެލްގެ މުޅިން އައު ޖަނަރޭޓަރަކާއެކު ތިނަދޫގެ އައު އިންޖީނުގެއިން މިއަދު ހިދުމަތްދޭން ފަށާފައިވާ ކަމަށެވެ.

މި ޖަނަރޭޓަރަކީ ސްޓެވޯއިން މިހާތަނަށް އެސެމްބަލްކުރި ޖަނަރޭޓަރު ތަކުގެ ތެރެއިން، ކޮމިޝަންކޮށް ބޭނުން ކުރަންފެށި ފުރަތަމަ ޖަނަރޭޓަރު ކަމަށް ސްޓެލްކޯއިން ވަނީ ބުނެފައެވެ. އަދި މިވަގުތު ތިނަދޫއަށް މި ޖަނަރޭޓަރުން ހިދުމަތް ދެމުންގެންދާއިރު، މި އައު ޖަނަރޭޓަރާއެކު، ތިނަދޫގެ ޖުމްލަ ކެޕޭސިޓީ 1136 ކިލޯ ވޯޓަށް ވަނީ އިތުރުކުރެވިފައި ކަމަށް އެކުންފުނިން ހާމަކުރެއެވެ. މީގެ ކުރިން ތިނަދޫގެ ކެޕޭސިޓީއަކީ، 656 ކިލޯ ވޯޓެވެ.

ސްޓެލްކޯއިން ބުނީ ތިނަދޫ ބައު އިންޖީނުގޭގައި ހުރި ޖަނަރޭޓަރުތައް އައު އިންޖީނުގެއަށް ބަދަލު ކުރެވުމާއެކު، ބައު އިންޖީނުގެ ބޭނުން ކުރުން އެއްކޮށް ހުއްޓާލާނެ ކަމަށެވެ. ތިނަދޫގެ އައު އިންޖީނުގެ ބޭނުންކުރަން ފަށާފައިމިވަނީ ތިނަދޫގެ ކަރަންޓު ޑިސްޓްރިބިއުޝަން ނެޓްވޯކްވެސް އަޕްގްރޭޑް ކުރުމަށްފަހުއެވެ.

މީގެ އިތުރުން ތިނަދޫ އިންޖީނުގޭގައި ސޯލާ އިންސްޓޯލް ކުރުމުގެ މަސައްކަތްވެސް މިވަގުތު ދަނީ ކުރަމުންނެވެ. އެގޮތުން ތިނަދޫ އިންޖީނުގޭގައި 20 ކިލޯވޯޓުގެ ސޯލާ އިންސްޓޯލް ކުރުމަށް ހަމަޖެހިފައިވާ ކަމަށް ސްޓެލްކޯއިން ހާމަކުރެއެވެ.