ރާއްޖޭގެ ދަރަނި އިތުރުވެ، އެކަމާމެދު ފާޅުކުރަމުންދާ ކަންބޮޑުވުންތަކަށް އޮތް ހައްލަކީ ދަރަނި ރީސްޓްރަކްޗަރ ކުރުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުން މަޖިލީހުގެ މިއަދުގެ ޖަލްސާ ފައްޓަވަމުން ރައީސް ނަޝީދު ވިދާޅުވީ އަންނަ އަހަރަށް ލަފާކޮށް ސަރުކާރުން ހުށަހެޅި ދައުލަތުގެ ބަޖެޓާ ގުޅޭގޮތުން މަޖިލީހުގެ ގިނަ މެމްބަރުން ފާޅުކުރަށްވާފައިވަނީ ދަރަނި އިތުރުވުމުގެ ކަންބޮޑުވުން ކަމަށެވެ.

އެގޮތުން ދައުލަތުން މިހާރު އެންމެ ބޮޑު އަހައްމިއްޔަތުކަމެއް ދޭން ޖެހޭނީ ދަރަނި އަނބުރާ ދައްކަންޖެހޭ ވަގުތުތަކުގައި ދައުލަތުގައި އެވަރަށް ފައިސާ ހުރިކަން ޔަގީން ކުރުން ކަމަށް ރައީސް ނަޝީދު ވިދާޅުވިއެވެ. އަދި އަންނަ އަހަރު 2.9 ބިލިއަން ރުފިޔާ ލޯނު ދެއްކުމަށް ޚަރަދު ކުރާއިރު، ދަރަނި މެނޭޖްކުރުމާ ގުޅޭ ގޮތުން މަޖިލީހުން ވާނީ ވަރަށް ފުރިހަމަ ރިޕޯޓެއް އެކުލަވާލާފައި ކަަމަށްވެސް ނަޝީދު ވިދާޅުވިއެވެ.

އެ ރިޕޯޓުގައި ދަރަނި ރިސްޓްރަކްޗަރ ކުރަން ލަފާދީފައިވާނެ ކަމަށާއި ދަރަނީގެ ގޮތުގައި ދެއްކުމަށް ކަނޑައަޅާފައިވާ އަދަދު ނުދައްކާ ގޮތަކަށް އެކަންކަން މެނޭޖް ކުރުން މި ވަގުތަށް މުހިންމު ކަމަށް ވެސް ރައީސް ނަޝީދު ވިދާޅުވިއެވެ. އެހެންކަމުން 2023 ވަނަ އަހަރު ވެސް އަނބުރާ ދައްކަންޖެހޭ ދަރަނީގެ އަދަދާއެކު އެ ފައިސާ އަނބުރާ ދައްކަންޖެހޭ ގްރޭސް ޕީރިއަޑް އިތުރުކޮށް އިންޓަރެސްޓް ރޭޓާއެކު ދަރަނި ރީސްޓްރަކްޗާ ކުރަންޖެހޭ ކަމަށް އެ ރިޕޯޓުގައިވާނެކަމަށް ވެސް އެމަނިކުފާނު ވިދާޅުވިއެވެ.

މިދިޔަ އަހަރުގެ އޮކްޓޯބަރު މަހު މަޖިލީހުން ފާސްކުރި ރިޕޯޓުގައި މައިގަނޑު ގޮތެއްގައި އަލިއަޅުވާލާފައި އޮތީ 2012 ވަނަ އަހަރާއި 2018 ވަނަ އަހަރާ ދެމެދު ނަގާފައިވާ ލޯނުތަކުގެ ތަފްސީލަށެވެ. އޭގެތެރޭގައި ދަރަނި ބަލަހައްޓާފައި ހުރި ގޮތާއި އެ ދަރަނި އަނބުރާ ދައްކަން ޖެހުނު އިރު ދައުލަތުގެ އާމްދަނީ ހުރި މިންވަރުގެ މައްޗަށެވެ. ނަމަވެސް އެކަންކަމަށް ބަލައި އާމްދަނީގެ ނިސްބަތުން ދަރަނި އަނބުރާ ދައްކަން ބަލާއިރު މިހާރު ދަރަނީގެ އަދަދުތައް ވަނީ އިތުރުވެފައެވެ.

މީގެއިތުރުން ރައީސް ނަޝީދު ވިދާޅުވީ ކޮވިޑުގެ ހާލަތާ ގުޅިގެން ބޮޑެތި ދަރަނިތައް އަނބުރާ ދެއްކޭފަދަ އާމްދަނީއެއް ދައުލަތަށް ނުލިބޭ ކަމަށާއި، ބަޖެޓުގައި ހިމަނާފައިވާ ފައިސާ ވެސް ވަރަށް ބޮޑަށް އިތުރުވެގެން ނޫނީ އެކަން ނުވާނެ ކަމަށް މިއަދުގެ ޖަލްސާގައި ރައީސް ނަޝީދު ވަނީ ފާހަގަކުރައްވާފައެވެ.