ތާލިބާނާއި އެމެރިކާއާ ދެމެދު ކުރާ މަޝްވަރާތައް އަންނަ ހަފުތާގައި ފެށުމަށް އިއުލާން ކޮށްފިއެވެ.

މި މަޝްވަރާތައް ބޭއްވުމަށް ހަމަޖެހިފައިވަނީ ގަތަރުގައެވެ. އެމެރިކާގެ ތަރުޖަމާނު ނެޑް ޕްރައިސް ވިދާޅުވީ އެމެރިކާގެ ފަރާތުން މި މަޝްވަރާގައި ބައިވެރިވެ ވަޑައިގަންނަވާނީ އަފްގާނިސްތާނަށް ޚާއްސަ މަންދޫބު ޓޮމް ވެސްޓް ކަމަށެވެ.

މި މަޝްވަރާތަކުގައި އިންސާނީ އެހީ ފޯރުކޮށްދިނުމާ ގުޅޭ ގޮތުންނާއި، ޓެރަރިޒަމާއި ދެކޮޅަށް މަސައްކަތް ކުރުމާ ބެހޭ ގޮތުން ފުޅާދައިރާއެއްގައި މަޝްވަރާ ކުރެވޭނެކަމަށްވެސް ނެޑް ވިދާޅުވިއެވެ.

އަފްޣާނިސްތާނުގެ ވެރިކަމާ އޮގަސްޓް މަހު ތާލިބާނުން ހަވާލުވުމަށްފަހު އެގައުމަށް އިގްތިސާދީ ގޮތުންވެސް ބޮޑެތި ގޮންޖެހުންތަކެއްވަނީ ކުރިމަތި ވެފައެވެ. އަދި އިންސާނީ އެހީ ހޯދުމަށްވެސް ބޮޑެތި ގޮންޖެހުންތަކެއްވަނީ ކުރިމަތިވެފައެވެ.

މި ބައްދަލުވުންތަކުގައިވެސް އެމެރިކާއިން ބުނަމުންދަނީ ތާލިބާނުންނަށް އެހީ ލިބޭނީ ޝަރުތުތަކެއްކެއްގެ މަތިން ކަމަށެވެ. އެގޮތުން، ޓެރަރިޒަމާ ދެކޮޅު ހަނގުރާމަ ވަރުގަދަ ކުރުމާއި، އެންމެންގެ ބައިވެރިވުން ހިމެނޭ ސަރުކާރެއް ގާއިމްކުރުމާއި، އަންހެނުންނާއި މައިނޯރިޓީންގެ ހައްގުތައް ދިނުމަށް ވަނީ ޝަރުތުކޮށްފައެވެ.

ތާލިބާނުން ވެރިކަމަށް އައުމަށް ފަހު އޮކްޓޫބަރު މަހުގައިވެސް ގަތަރުގައި އެމެރިކާއާއެކު ވަނީ ބައްދަލުވުމެއް ބާއްވާފައެވެ.