ސިންގަޕޫރަށް ދަތުރުކުރުމަށްފަހު ކަރަންޓީންވާން ނުޖެހޭ ގައުމުތަކުގެ ލިސްޓުގައި ރާއްޖެ ހިމެނައިފިއެވެ.

މި ލިސްޓަށް މިހާރުވަނީ ރާއްޖޭގެ އިތުރުން، އިތުރު 5 ގައުމެއް ހިމަނާފައެވެ. ސިންގަޕޫރުގެ ސިވިލް އޭވިއޭޝަން އޮތޯރިޓީން ބުނީ އަންނަ ޑިސެމްބަރު މަހުގެ މެދުތެރެއިން ފެށިގެން، ތައިލެންޑް، ކެމްބޯޑިއާ، ފީޖީ، ދިވެހިރާއްޖެ، ސްރީލަންކާ އަދި ތުރުކީން އެގައުމަށް ދަތުރުކުރާ މީހުން ކަރަންޓީން ވާން ނުޖެހޭނެ ކަމަށެވެ.

ސިންގަޕޫރުން ގެންދަނީ ވެކްސިން ޖަހަމުންގެންދާ ނިސްބަތަށް ބަލައި މިފަދަ ގައުމުތައް ލިސްޓަށް އިތުރުކުރަމުންނެވެ. މި 6 ގައުމާއެކު މިވަގުތު މި ލިސްޓުގައި 27 ގައުމެއް ހިމެނެއެވެ.

ޑިސެމްބަރު 14 ގެ ފަހުން ތައިލޭންޑުން ސިންގަޕޫރަށް ދާ މީހުން ކަރަންޓީން މުއްދަތު ފުރިހަމަކުރަން ނުޖެހޭނެ ކަމަށް އެގައުމުގެ ސަރުކާރުން ބުނެފައިވެއެވެ. އަދި ޑިސެމްބަރު 7 ވަނަ ދުވަހުން ފެށިގެން ވެކްސިނޭޓެޑް ޓްރެވަލް ޕާސްއަށް އެދެވޭނެއެވެ. ކެމްބޯޑިއާ، ފީޖީ، ދިވެހިރާއްޖެ، ސްރީލަންކާ އަދި ތުރުކީން ސިންގަޕޫރަށް ދަތުރުކުރާ މީހުންނަށް ޑިސެމްބަރު 16 ގެ ފަހުން އެ ގައުމަށް އެތެރެވެ ކަރަންޓީނު ފުރިހަމަކުރާކަށް ނުޖެހޭނެއެވެ. އަދި ޑިސެމްބަރު 9 ވަނަ ދުވަހުން ފެށިގެން ވެކްސިނޭޓެޑް ޓްރެވަލް ޕާސްއަށް އެދެވޭނެ ކަމަށް ސިންގަޕޫރު ސަރުކާރުން ބުނެފައިވެއެވެ.

ކަރަންޓީނާ ނުލައި ސިންގަޕޫރަށް ދަތުރުކުރެވޭނީ ވެކްސިންގެ ދެ ޑޯޒް ފުރިހަމަކޮށް، ނެގެޓިވް ޕީސީއާރު ޓެސްޓެއް އޮތުމުންނެވެ.