މިއަހަރުގެ ޓޫރިސްޓް ބެޑްނައިޓްސް ނުވަތަ ފަތުރުވެރިން ރޭކުރި އަދަދު ދިހަ މިލިއަނަށް އަރައިފި ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރ މައުސޫމް މިއަދު ވިދާޅުވީ މިއަހަރު ތެރޭ ފަތުރުވެރިން ރާއްޖޭގައި ހޭދަކޮށްފައިވާ ރޭގެ އަދަދު 10 މިލިއަނަށް އަރައިފި ކަމަށާއި، ފަތުރުވެރިކަމަށް އިތުރު ހީނަރުކަމެއް ކުރިމަތި ނުވެއްޖެނަމަ 2019ގެ 10.7 މިލިއަންގެ ބެޑްނައިޓްގެ ރެކޯޑް މުގުރާލެވޭނެ ކަމަށެވެ.

މައުސޫމް ވިދާޅުވީ މިއަހަރުގެ ބެޑްނައިޓްސްގެ އަދަދު މިމަހުގެ މެދުތެރޭގައި 2019 ވަނަ އަހަރަށްވުރެ އިތުރުވާނެ ކަމަށް ޤަބޫލު ކުރަށްވާކަމަށެވެ. މިދިޔަ ނޮވެމްބަރ މަހުގެ ނިޔަލަށް ރާއްޖެއަށް ވަނީ 1.15 މިލިއަން ފަތުރުވެރިން ޒިޔާރަތް ކޮށްފައެވެ. މިނިސްޓަރު ވަނީ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުގެ އަގު ވަޒަންކޮށް އެފަރާތްތަކަށް ތަހުނިޔާ ކިޔާފައެވެ.

Congratulations and best wishes to industry partners, sector employees and well wishers on #Maldives achieving #TenMillion tourist bednights for 2021. With this trend, Maldives will surpass 2019 record of 10.7 Miliion tourist bednights by mid Dec.#TogetherWeCan

— Abdulla Mausoom (@Mausoom_Maus) December 2, 2021

ސަރުކާރުން ކުރިން ލަފާކޮށްފައިވަނީ، މިއަހަރު 1.3 މިލިއަން ފަތުރުވެރިން ރާއްޖެ އަންނާނެކަމަށެވެ. މީގެއިތުރުން މިއަހަރުގެ ތެރޭގައި 10 މިލިއަނަށްވުރެ ބެޑް ނައިޓްސް އިތުރުވާނެކަމަށްވެސް ފަތުރުވެރިކަމުގެ ވުޒާރާއިން ވަނީ އަހަރު ފެށުމުގެ ކުރިން އަންދާޒާކޮށްފައެވެ.

ކޯވިޑާއި ގުޅިގެން ރާއްޖޭގެ ބޯޑަރުތައް 110 ދުވަހަށް ބަންދު ކުރުމަށް ފަހު އަލުން ހުޅުވީ މިދިޔަ އަހަރުގެ ޖުލައި މަހުގެ 15 ވަނަ ދުވަހުއެވެ. މިދިޔަ އަހަރު ނިމުނުއިރު ރާއްޖެއަށް އައިސްފައިވަނީ 555،494 ފަތުރުވެރިންނެވެ.