ކުރީގެ ރައީސުންގެ އޮފީސް ހިންގުމުގެ ޚަރަދުގެ ތަފްސީލް ހާމަކުރުމަށް ދަޢުލަތުގެ މާލީ ވުޒާރާއިން ޢުޒުރުވެރިވެއްޖެއެވެ.

ދަޢުލަތުން އެކިއެކި ޚަރަދުތައް ކުރާ ގޮތުގެ ތަފްސީލްތައް ހޯއްދަވައި ހާމަކުރަށްވަމުން ގެންދަވާ އައިމަން ލަތީފް މިއަދު ވިދާޅުވީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ކުރީގެ ރައީސްކަން ކުރެއްވި ބޭފުޅުންނަށް ދައުލަތުން އެބޭފުޅުންގެ އޮފީސް ހިންގުމަށް ދޭ ޢިނާޔަތުގެ ތަފްސީލު ހޯދުމަށް މާލީ ވުޒާރާއަށް ހުށައަޅާފައިވާ ކަމަށެވެ. ނަމަވެސް އެކަމަށް މާލީ ވުޒާރާ ޢުޒުރުވެރިވެފައިވާކަން ވަނީ ފާހަގަ ކުރެވިފައެވެ.

އައިމަންގެ ހުށަހެޅުމަށް މާލީ ވުޒާރާއިން ދެއްވި ޖަވާބުގައި ވަނީ ކުރީގެ ރައީސް މައުމޫން އަބްދުލް ގައްޔޫމް އާއި ރައީސް ނަޝީދުގެ އިތުރުން ޑރ. މުހައްމަދު ވަހީދު ހަސަން މަނިކުގެ އޮފީސް އެޑްރެހާއި ގުޅޭނެ ނަންބަރެވެ. އެ ލިސްޓުގައި ކުރީގެ ރައީސް ޢަބްދުالله ޔާމީންގެ ނަންފުޅެއް ނެތެވެ. މާލީ ވުޒާރާއިން އެދިފައިވަނީ އެ ބޭފުޅުންގެ އޮފީސްތަކަށް ހުށައަޅައިގެން އެމައުލޫމާތު ހޯދުމަށެވެ.

އައިމަން މިއަދު ވިދާޅުވީ މާލީ ވުޒާރާގެ ޖަވާބުގައިވާ ގޮތަށް އެ މަޢުލޫމާތު ހޯއްދެވުމަށް އެ އޮފީސްތަކަށް ހުށައަޅުއްވާނެ ކަމަށެވެ.

Requested for details from @MoFmv about the offices of former presidents and how they each use the MVR 175,000 they get every month to run said office

The ministry gave me the contact details of the offices and told me to ask them myself - so I shall pic.twitter.com/a0cUastDPW

— Piko (@AimonLatheef) December 11, 2021

ދަޢުލަތުން ކުރީގެ ރައީސުންނަށް އޮފީސް ހިންގުމުގެ ޚަރަދުގެ ގޮތުގައި މަހެއްގެ މައްޗަށް 175،000 ރުފިޔާގެ ޢިނާޔަތެއް ދެމުން ގެންދެއެވެ. ނަމަވެސް އެތަނުން ކުރާ މަސައްކަތެއް ނޭނގުމުގެ ޝަކުވާ ޢާއްމުންގެ މެދުގައި ބޮޑެވެ. ކުރީގެ ރައީސްކަން ކުރެއްވި ހުރިހާ ބޭފުޅުންވެސް އަދިވެސް އުޅުއްވަނީ ސިޔާސީ މަސައްކަތުގައެވެ.