ބާރުބޮޑު ވަގުތުތަކުގައި ކޮންމެ 15 މިނެޓަކުން ހިޔާ ފްލެޓް ސަރަހައްދަށް ބަސް ދަތުރުގެ ޚިދުމަތް ދިނުމަށް އެމްޓީސީސީން ނިންމައިފިއެވެ.

އެމްޓީސީސީން ބުނެފައިވަނީ މިއަދުން ފެށިގެން ހިޔާ ފްލެޓް ސަރަޙަށްދަށް ބާރުބޮޑު ވަގުތުތަކުގައި ކޮންމެ 15 މިނެޓަކުން ބަސް ދަތުުރުކުރާ ގޮތަށް ހަމަޖައްސާފައިވާ ކަމަށެވެ. މީގެ ކުރިން އެ ސަރަހައްދަށް ބަހުގެ ހިދުމަތް ދޭން ފެށީ މިދިޔަ އޮކްޓޫބަރު މަހުގެ ދެވަނަ ދުވަހު ކޮންމެ 30 މިނެޓަކުންނެވެ.

ހިޔާ ފްލެޓްގައި ދިރިއުލޭ ފަރާތްތަކުގެ ޢަދަދު އިންތިހާއަށް އިތުރުވެފައިވީ ނަމަވެސް އެ ސަރަޙައްދަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގައި ސަރުކާރުން އިހުމާލުވެފައިވާ ކަމަށް ފްލެޓްތަކުގައި ދިރިއުޅޭ ރައްޔިތުން ދަނީ ބުނަމުންނެވެ.

ރައީސް ޔާމީންގެ ވެރިކަމުގައި ޢިމާރާތްކުރެއްވި ހިޔާ ފްލެޓްތަކަށް މި ސަރުކާރުން އިހުމާލުވަމުންދާ ކަމުގެ ޝަކުވާގެ އަޑުތައް ގަދަވެފައިވާއިރު ހިޔާފްލެޓްތަކުން ކުނި އުކާލުމުގައި އެކަށީގެންވާ ނިޒާމެއް މިއަދާހަމައަށްވެސް ޤާއިމްކުރެވިފައެއް ނުވެއެވެ. އެކަމާ ގުޅިގެން ހިޔާ ސަރަޙައްދުގައި ކުނި ޖަމާވެ ދޭތެރެދޭތެރެއިން ކުނިތަކުގައި ރޯވުމުގެ ޙާދިސާތައްވެސް ވަނީ ހިނގާފައެވެ.

މީގެ އިތުރުން ފްލެޓްތައް ހިމެނޭ ސަރަޙައްދުގެ ސަލާމަތީ ކަންތައްތައް ނުބެލެހެއްޓޭކަމުގެ ޝަކުވާގެ އަޑުވެސް ވަނީ ގަދަވެފައެވެ.