މާލެ ކައިރީ ފަޅުތައް ހިއްކައިގެން ވިޔަސް މާލޭގެ ރައްޔިތުންނަށް މި ސަރުކާރުން ގޯތި ދެއްވާނެ ކަމަށް ރައީސް އިބްރާހިމް މުހައްމަދު ޞާލިޙް ވިދާޅުވެއްޖެ އެވެ.

23 ރަށެއްގެ ފެނާއި ނަރުދަމާ ގާއިމުކުރުމުގެ އެއްބަސްވުމުގައި ސޮއިކުރުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ، މުޅި ރާއްޖޭގައި ނަރުދަމާ އާއި ފެން އެޅުމަށްފަހު މިހާރު އަމާޒު ހިފާފައި ހުރީ މާލޭގެ ރައްޔިތުންނަށް ގޯތި ދިނުމުގެ ވަޢުދު ފުއްދުމަށް ކަމަށެވެ.

މާލޭގެ ރައްޔިތުންގެ ގޯތި ގެދޮރުގެ މައްސަލަ އަކީ ހަގީގަތުގައިވެސް ބޮޑު މައްސަލައެއް ކަމަށާއި އެވާހަކަ ދައްކާ ވަރަށް ގިނަ ރައްޔިތުންތަކެއް އެބަ ތިބި ކަމަށް ރައީސް ވިދާޅުވިއެވެ. ނަމަވެސް ސިޔާސީ އެކިއެކި ފައިދާ ހޯދުމަށްޓަކައި ކަނޑައެޅިގެން ކަން އޮތް ގޮތް އެނގިތިބެ އެނޫން ގޮތްގޮތަށް ވާހަކަ ދައްކާ މީހުންވެސް އެބަ އުޅޭ ކަމަށް ރައީސް މިއަދު ވިދާޅުވިއެވެ.

މިހާރުވެސް ހުޅުމާލޭގައި 5000 ހައުސިން ޔުނިޓް އެޅުމުގެ މަސައްކަތް ކުރިއަށްދާކަން ފާހަގަކުރައްވައި ރައީސް ވިދާޅުވީ، މާލޭގެ ރައްޔިތުންނަށް ގޯތި ދިނުމުގެ މަޝްރޫއެއް ކުރިއަށް ގެންދިއުމަށް ރާވާފައި އެބަ އޮތް ކަމަށެވެ. އަދި ގޯތި ދޭނީ ގުޅިފަޅުންނާއި ހުޅުމާލޭން އެކަނި ނޫން ކަމަށާއި އެހެން ފަޅުތަކުންވެސް ގޯތި ދޭނެ ކަމަށް ވިދާޅުވި އެވެ.

"އަޅުގަނޑުމެން ގޯތި ދޭނީ ގުޅިފަޅުން އެކަންޏެއްނޫން. ހުޅުމާލެއިންވެސް ގޯތި ދެވޭނެ. އަދި އެހެން ފަޅުތަކުންވެސް ލިބޭނެ. އަޅުގަނޑުމެން މި ދައްކަނީ 1000 ގޯތީގެ ވާހަކައެއް ނޫން. އޭގެ ދެގުނަ ތިންގުނަ، އިރާދަކުރެއްވިއްޔާ ހަތަރު ގުނަ ގޯތި މާލޭގެ ރައްޔިތުންނަށް އަމާޒުކޮށްގެން ކޮށްދޭނަން،" ރައީސް މިއަދު ވިދާޅުވި އެވެ.

ސަރުކާރުގެ ބޯހިޔާވަހިކަމުގެ ވަޢުދު ރަނުން ރަނަށް ފުއްދުމުގައި މި ސަރުކާރުން ވަނީ އެންމެ ތިން އަހަރުތެރޭގައި 7000 އަށް ވުރެ ގިނަ ޢަދަދެއްގެ ގެދޮރު ބިނާކުރުމުގެ މަސައްކަތް ހަމައެކަނި ގްރޭޓަރ މާލެ ސަރަޙައްދުގައި ހިންގާފައެވެ. އެގޮތުން އެފޯޑަބަލް، 4440 ހައުސިންގް ޔުނިޓްގެ މަސައްކަތް މާލޭ ސަރަޙައްދުގައި މިވަގުތު ދަނީ ކުރިއަށެވެ. ހަމަ އެއާއެކު މިޑްރޭންޖްގެ ޢާމްދަނީ ލިބޭ ޢާއިލާތަކަށް ޚާއްސަކޮށްގެން ޢިމާރާތްކުރާ 640 ހައުސިންގެ މަސައްކަތް ކުރިއަށް ދާއިރު، 1920 ކައުންސިލް ހައުސިންގެ މަސައްކަތްވެސް މިވަގުތު ދަނީ ކުރިއަށެވެ.