އުތުރު ކޮރެޔާގެ ޒުވާން، ހުދުމުހުތާރު ލީޑަރު ކިމް ޖޮންގް އުން އާ އަަހަރުގެ މުނާސަބާތުގައި ދެއްވާ ބަޔާނުން ވޭތުވެދިޔަ 10 އަހަރުވެސް އާއްމު ގޮތެއްް އިވުނީ ނިއުކްލިއަރ ހަތިޔާރާއި އެމެރިކާއާއެކު ކުރިން އޮތް ދެކޮޅުވެރިކަމުގެ ވާހަކަތަކެވެ. ރައްޔިތުންގެ ތަރައްޤީއަށް ކުރަންޖެހޭ ކަންކަމަށް ވުރެ ބޮޑަށް ދައްކަނީ ހަނގުރާމައަށް ތައްޔާރުވުމުގެ ބިރުވެރި ވާހަކަތަކެވެ. ނަމަވެސް މި ފެށުނު 2022 ވަނަ އަހަރުގެ މުނާސަބާގައި ކިމް އިއްވެވި ބަޔާން ވަރަށް ތަފާތެވެ.

އުތުރު ކޮރެޔާގެ ރަސްމީ ނިއުސް އެޖެންސީން އާއްމުކޮށްފައިވާ ބަޔާނަށް ބަލާލާއިރު ކިމް އިއްވެވި ބަޔާނުގައި ސްކޫލްތައް އިމާރާތްކުރުމާއި ތަރައްގީގެ މަސައްކަތްތަކާ ކާރުހާނާތައް ބިނާކުރުމުގެ ވާހަކަ ވަރަށް ބޮޑަށް ދެއްކެވިއެވެ. އަދި އާ އަހަރުގެ އެންމެ ބޮޑު އަމާޒަކީ އިނދަޖެހިފައިވާ އުތުރު ކޮރެޔާގެ އިގްތިސާދު ކޮޅަށް ޖެހުމުގެ މަސައްކަތްކަމަށް ހުކުރު ދުވަހު ބޭއްވި ނޯތު ކޮރެޔާގެ ކޮމިއުނިސްޓް ޕާޓީގެ ބައްދަލުވުމެއްގައި ދިން ބަޔާނުގައި ކިމް ވިދާޅުވިއެވެ.

މީގެކުރިން ކިމް ދެއްކެވި ވާހަކަފުޅުތަކުގައި އެމެރިކާއަށް ވަރަށް ބޮޑަށް ފާޑު ވިދާޅުވިނަމަވެސް މިފަހަރުގެ ބަޔާނުގައި އެމެރިކާގެ ވާހަކައެއްވެސް ނެތެވެ. ހަމައެކަނި އޮތީ ދެކުނު ކޮރެޔާއާއެކު ކުރިއަށްދާ ސުލްހައިގެ ވާހަކަތަކަށް އަލިއަޅުއްވާލެއްވި ފޮޅުވަތްތަކެއް އެކަންޏެވެ.

ކިމްގެ ވާހަކަފުޅުގައި ތަރައްގީގެ ގައުމީ ޕްލޭންތަކެއް އެކުލަވާލައި، އެކަމުގެ ނަތީޖާ ނެރުމަށް ގިނަ މަސައްކަތްތަކެއް ކުރައްވާނެކަމަށް ވިދާޅުވިއެވެ.

ކިމްގެ ވާހަކަފުޅުގައި ތަރައްގީގެ މަސައްކަތްތަކަށް ވަރަށް ބޮޑަށް އަލިއަޅުއްވާލައްވާފައިވާއިރު، މިއީ އުތުރު ކޮރެޔާއަށް މިވަގުތު ކުރިމަތިވެފައިވާ އިގްތިސާދީ ގެއްލުމުގެ ސަބަބުން، މަގްބޫލްކަން ހޯއްދެވުމަށް ދެއްކެވި ވާހަކަތަކެއްކަމަށް ބައެއް ފަރާތްތަކުން ބުނެއެވެ.