ގެއްލުނު ދޯނީގެ ބައެއް ސާމާނުތައް އޮޔާދަނިކޮށް ފެނިފައިވާ ކަމަށާއި އެހެންކަމުން ދަތުރުކުރަށްވާ ފަރާތްތަކުން އެކަމަށް ސަމާލުވާން އެމްއެންޑީއެފުން އެދިއްޖެއެވެ.

އެމްއެންޑީއެފުން ބުނީ ގެއްލިގެން ހޯދަމުންދާ "އަލަމާ 5" ދޯނިން ކަނޑަށް ދޫވެ އޮޔާދާކަމަށް ބެލެވޭ ސާމާނުތަކެއް ފ.އަތޮޅުގެ އުތުރުން 1 ނޯޓިކަލް މޭލު ބޭރުން، އެމްއެންޑީއެފް ކޯސްޓްގާޑަށް ފެނިފައިވާ ކަމަށެވެ.

އެމްއެންޑީއެފުން މިއަދު ބުނީ 3 މީހުންނާއެކު ވ. ފުއްސަރު ކައިރިން ދަތުރުކުރަމުންދިޔަ "އަލަމާ-05" ނަމަކަށް ކިޔާ ދޯނި، އަޑިއަށްދާ ކަމުގެ މަޢުލޫމާތު ކޯސްޓްގާޑަށް ލިބުނީ ރޭ 23:22 ގައި ކަމަށެވެ. އަދި އެ ވަގުތުން ފެށިގެން އެ ދޯނި ހޯދުމުގެ މަސައްކަތް ކުރަމުންދާ ކަމަށް އެމްއެންޑީއެފުން ވަނީ ބުނެފައެވެ.

ގެއްލިގެން ހޯދަމުންދާ "އަލަމާ 5" ދޯނިން ކަނޑަށް ދޫވެ އޮޔާދާކަމަށް ބެލެވޭ ސާމާނުތަކެއް ފ.އަތޮޅުގެ އުތުރުން 1 ނޯޓިކަލް މޭލު ބޭރުން، އެމްއެންޑީއެފް ކޯސްޓްގާޑަށް ފެނިއްޖެ. pic.twitter.com/g2UVQ2tnqf

— Maldives National Defence Force (@MNDF_Official) January 4, 2022

އެ ދޯނި ދަތުރުކުރަމުން ދިޔައީ ފ.ފީއަލި ކައިރިން ފާނަ މަސްވެރިކަމުގައި އުޅޭ ދޯނިފަހަރުން ފާނަ ގަނެގެން މާލެއަށް ކަމަށާއި ވ.ފުއްސަރުގެ ހުޅަނގު ދެކުނުން 4 ވަރަކަށް ނޯޓިކަލް މޭލު ބޭރުގައި އޮއްވައި ދޯނި ދިޔަވެ އަޑިއަށް ދާކަމުގެ މަޢުލޫމާތު ލިބިފައިވާ ކަމަށް އެމްއެންޑީއެފުން ވަނީ ބުނެފައެވެ.

ފ.ފީއަލިން ފުރައިގެން މާލެ ދަތުރުކުރަމުންދިޔަ "އަލަމާ-5" ނަމަކަށް ކިޔާ ދޯންޏެއް ވ.ފުއްސަރުގެ ހުޅަނގުދެކުނުން 4 ނޯޓިކަލް މޭލު ބޭރުން ދިޔަވެ އަޑިއަށްދާކަމުގެ މަޢުލޫމާތު ލިބިގެން އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑްރަންއިން ހަރަކާތްތެރިވާން ފަށައިފި. pic.twitter.com/OD42Sr9lwP

— Maldives National Defence Force (@MNDF_Official) January 4, 2022

މި އުޅަނދާއި މީހުން ހޯދުމަށްޓަކައި އެމްއެންޑީއެފް ކޯސްޓްގާޑުން މިހާރު ދަނީ ހަރަކާތްތެރި ވަމުންނެވެ.