ކޮންޓްރެކްޓާ ފައިނޭންސްގެ އުސޫލުން ތިން ރަށެއްގައި ހޮސްޕިޓާ އެޅުމަށް މާޅީ ވުޒާރާއިން ހުޅުވާލައިފިއެވެ.

ރައީސް އިބްރާހިމް މުޙައްމަދު ޞާލިޙްގެ ވަޢުދުފުޅާ އެއްގޮތަށް ހއ. އިހަވަންދޫއާއި ނ. ކެނދިކުޅުދޫ އަދި ޅ. ހިންނަވަރުގައި ހޮސްޕިޓާ އެޅުމަށް ހުޅުވާލީ އިއްޔެއެވެ. މާލީ ވުޒާރާއިން ކޮށްފައިވާ އިޢުލާނުގައިވަނީ ކޮންޓްރެކްޓާ ފައިނޭންސްގެ އުސޫލުން ކުރިއަށްގެންދާ އެ ތިން ޕްރޮޖެކްޓްގެ ބީލަން ހުޅުވުން އޮންނާނީ އަންނަ ފެބްރުއަރީ މަހުގެ 28 ވާ ހޯމަ ދުވަހުގެ 13:00 ގައި އެ މިނިސްޓްރީގައި ކަމަށެވެ.

މި މަޝްރޫޢަށް ކުރިމަތިލާ ދިވެހި ކުންފުނިތައް ވާންވާނީ ޕްލޭނިން މިނިސްޓްރީން އެކުލަވައިލާފައިވާ "އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ޤަވާޢިދު"ގެ ދަށުން ރަޖިސްޓަރީވެފައިވާ ކުންފުނިތަކަށް ކަމަށް އެއިޢުލާނުގައިވެއެވެ. މި މަސައްކަތަށް ކުރިމަތިލާ ފަރާތްތަކުން ބިޑް ސެކިއުރިޓީގެ ގޮތުގައި 690،000 ރުފިޔާ ބަހައްޓަން ޖެހެއެވެ.

މި ބީލަން ކުރިއަށް ގެންދަނީ އިންޓަރނޭޝަނަލް ކޮމްޕެޓިޓިވް ބިޑިން (އައި.ސީ.ބީ) އުސޫލުގެ މަތިން، މަސައްކަތް ކުރާނެ ފަރާތައް ހޯދުމަށް ތައްޔާރުކޮށްފައިވާ ރެގިއުލޭޝަނާ އެއްގޮތަށް ކަމަށް އެ ވުޒާރާއިން ވަނީ ބުނެފައެވެ.

ރާއްޖޭގެ ތިން ރަށެއްގައި ހޮސްޕިޓާ އެޅުމަށް ހުޅުވާލާފައިވާއިރު ރައްޔިތުންނާ ގާތުން ރަނގަޅު ސިއްޙީ ޚިދުމަތެއް ފޯރުކޮށްދިނުމަށް މި ސަރުކާރުން ވެފައިވާ ވަޢުދު ފުއްދާނެ ކަމަށް ރައީސް އޮފީހުގެ ޕޮލިސީ ސެކްރެޓަރީ އަޙްމަދު ޙަމްދާންވެސް ދާދިފަހުން ވަނީ ވިދާޅުވެފައެވެ.