ރިޔާސީ ބަޔާން އިއްވުމަށް މާދަމާ ބާއްވާ ޖަލްސާ އިދިކޮޅުން ބޮއިކޮޓްކޮށްފިއެވެ.

ގާނޫނުއަސާސީގެ 84 ވަނަ މާއްދާގައިވާ ބުނެފައިވަނީ ގައުމުގެ ހާލަތު ‏‏ބަޔާންކޮށްދީ އަދި ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭ ކަންތައްތައް ‏‏ހިމެނޭ ރިޔާސީ ބަޔާނެއް ރައްޔިތުންގެ މަޖިލީހަށް އިއްވެވުމަކީ ރައީސުލްޖުމްހޫރިއްޔާއަށް ލާޒިމްކުރާ ކަމެއް ކަމަށެވެ. އެގޮތުން ރިޔާސީ ބަޔާނުގައި އާންމު ގޮތެއްގައި ގައުމުގެ ހާލަތު ބަޔާންކޮށްދޭއިރު، ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭކަަމަށް ރައީސުލްޖުމްހޫރިއްޔާއަށް ފެންނަ ކަންތައްތަކުގެ މައްޗަށް އަލިއަޅުއްވާލަންވާނެ ކަމަށް އެމާއްދާގައި ބުނެފައިވެއެވެ.

އިދިކޮޅު ޕީޕީއެމުން މިރޭ ނެރެފައިވާ ބަޔާނެއްގައި ބުނެފައިވަނީ ޚުދުމުޚުތާރު، ޑިމޮކްރެސީގެ ހަމަތަކާއި ބީރައްޓެހި، ގައުމުގެ މިނިވަންކަން އަވަށްޓެރި ގައުމަކަށް ވިއްކާލާފައިވާ ބޭފުޅަކު ރިޔާސީ ބަޔާން އިއްވާ ޖަލްސާގައި، އިދިކޮޅު ކޯލިޝަނުން ބައިވެރިނުވާން ނިންމާފައިވާ ކަމަށެވެ.

ރިޔާސީ ބަޔާން އިއްވާ ޖަލްސާގައި މި ކޯލިޝަނުން ބައިވެރި ނުވާނެ. pic.twitter.com/gk98pWoKMj

— Progressive Party of Maldives (@ProgressPartyMV) February 2, 2022

މިއަހަރު ރިޔާސީ ބަޔާން އިއްވާ ޖަލްސާ އޮންނާނީ މާދަމާ ހެނދުނު 10:00ގައި ރައްޔިތުންގެ މަޖިލީހުގެ އިދާރާގައެވެ.

ސަރުކާރުގެ އޮފިޝަލަކު ވިދާޅުވީ މިއަހަރުގެ ރިޔާސީ ބަޔާނުގައި ބަޔާނުގައި ރާއްޖޭގެ ހާލަތަށް ތަފްސީލްކޮށް އަލިއަޅުއްވާލައްވައި، މިދިޔަ އަހަރު ރާއްޖޭގެ ތަރައްޤީއަށް ކުރައްވާފައިވާ މަސައްކަތްޕުޅާއި، ކުރިއަށް އޮތް އަހަރަށް އެމަނިކުފާނު ގެންގުޅުއްވާ ތަރައްޤީގެ ތަސައްވުރު ވަރަށް ބޮޑަށް ހާމަކުރައްވާނެކަމަށެވެ. އިޤްތިޞާދީ ހާލަތާއި ކޯވިޑުން އަރައިގަތުމަށް ކުރައްވާ މަސައްކަތްތަކަށްވެސް ރިޔާސީ ބަޔާނުގައި އަލިއަޅުއްވާލައްވާނެކަމަށް އޮފިޝަލް ވިދާޅުވިއެވެ.

މި ރިޔާސީ ބަޔާނަކީ ރައީސް ސާލިހް އިއްވަވާ 4 ވަނަ ރިޔާސީ ބަޔާން ކަން ފާހަަގަކޮށްލެވެއެވެ.