ރިސޯޓު ހަދަން ހުޅުވާލި 21 ރަށަށް ބީލަން ހުށައެޅުމަށް ދިން މުހުލަތު އިތުރުކޮށްފިއެވެ.

ފަތުރުވެރިކަމާބެހޭ ވުޒާރާއިން މިރޭ ބުނީ ފަތުރުވެރިކަމަށް ހުޅުވާލި ރަށްތަކަށް ބިޑްކުރަން ދިން މުއްދަތު އިތުރުކޮށްފައިވާ ކަމަށެވެ. އެގޮތުން ހއ، ހދ، ށ އަދި ރ އަތޮޅުގެ ރަށްތަކަށް ބިޑްކުރުން 22 މާޗް 2022ގެ ހެނދުނު 10 ޖެހުމާ ހަމައަށް އޮންނާނެއެވެ.

އޭގެ އިތުރުން މ، ފ، އަދި ތ. އަތޮޅުގެ ރަށްތަކަށް ބިޑްކުރުން 27 މާޗް 2022ގެ މެންދުރު 1 ޖެހުމާ ހަމައަށް އިތުރުކޮށްފައިވާއިރު ލ، ގއ، އަދި ގދ އަތޮޅުގެ ރަށްތަކަށް ބިޑްކުރުމުގެ މުއްދަތު 23 މާޗް 2022ގެ ހެނދުނު 10 ޖެހުމާ ހަމައަށް ވަނީ އިތުރުކޮށްފައެވެ.

ފަތުރުވެރިކަމާބެހޭ ވުޒާރާއިން ބުނީ ރަށްތަކަށް ބިޑް ހުށަހެޅުމުގެ ތާރީހުތަކަށް ބަދަލު ގެނައީ އިންވެސްޓްރުންނަށް އިތުރުވަގުތު ދިނުމުގެ ގޮތުންކަމަށެވެ. އެގޮތުން ކޮވިޑުގެ އޮމިކްރޮން ވޭރިއަންޓާ ގުޅިގެން ދުނިޔޭގެ އެކި ގައުމުތަކުގައި އަޅަމުން އަންނަ ފިޔަވަޅުތަކުގެ ސަބަބުން ދަތުރުފަތުރުކުރުމާއި ވިޔަފާރީގެ ބައެއް ކަންކަމަށް ހުރަސް އެޅިފައި ވާކަމަށް މިނިސްޓްރީން ހާމަކޮށްފައިވެއެވެ.

ފަތުރުވެރިކަމަށް ހުޅުވާލި ރަށްތަކަށް ބިޑްކުރުމަށް ދީފައިވާ މުހުލަތަށް ގެނައި ބަދަލާއެކު ރަށްތަކާ ގުޅޭ މައުލޫމާތު ސާފުކުރުމާއި ބިޑް ފޮތް ގަތުމަށް ދީފައިވާ މުއްދަތު ވެސް އަންނަ މަހުގެ 17 ވަނަ ދުވަހުގެ ނިޔަލަށް މިހާރުވަނީ އިތުރުކޮށްފައެވެ.