އެޖެންޑާ-19 އަށް ދިވެހިރައްޔިތުންގެ ތާއީދު އެބައޮތް ކަމަށް އެމްޑީޕީން ބުނެފިއެވެ.

މިއަދު ބޭއްވި ކޮމަންޑޫ ދާއިރާގެ ބައި-އިލެކްޝަންގެ ކާމިޔާބީ ފާހަގަކުރުމަށް މޯލްޑިވިއަން ޑިމޮކްރެޓިކް ޕާޓީ، އެމްޑީޕީން މިރޭ ބޭއްވި ނޫސްވެރިންގެ ބައްދަލުވުމުގައި އެޕާޓީގެ ޗެއަރޕާސަން ހަސަން ލަތީފް ވިދާޅުވީ އެޖެންޑާ-19 އަށް އޮތް ތާއީދު ކޮމަންޑޫ ދާއިރާއިން ފެނިއްޖެ ކަމަށެވެ. އަދި އެޖެންޑާ-19 ގައި ބަޔާންކޮށްފައިވާ 70 އިންސައްތަ މަސައްކަތް މިހާރު ކޮށްފައިވާކަން ޙަސަން ފާހަގަކުރެއްވިއެވެ.

"އެޖެންޑާ-19 އަށް ލިބުނު ވޯޓުގެ ނަތީޖާ މި ފެނިގެންދިޔައީ." ހަސަން ލަތީފް ވިދާޅުވި އެވެ.

އިލެކްޝަން ކޮމިޝަނުން އިޢުލާނުކޮށްފައިވާ އިންތިޚާބުގެ ވަގުތީ ނަތީޖާ ދައްކާގޮތުން އިންތިޚާބުގައި ރާޝިދަށް 1401 ވޯޓު ލިބިފައިވާއިރު ފަތުޙީއަށް ލިބިފައިވަނީ 1161 ވޯޓެވެ. އަދި ހަންނާނަށް ލިބިފައިވަނީ 323 ވޯޓެވެ.

މަޖިލީހުގެ ކޮމަންޑޫ ދާއިރާގެ ގޮނޑި ހުސްވީ އެ ދާއިރާގެ މެމްބަރު ހުސައިން ވަހީދު އަވަހާރަވުމާއި ގުޅިގެންނެވެ.