ވައިގެ މަގުން ރާއްޖެއަށް އެތެރެކުރަން އުޅުނު 21 މިލިއަން ރުފިޔާގެ މަސްތުވާތަކެއްޗާއެކު ހައްޔަރުކުރި ދެމީހުންގެ ބަންދަށް 5 ދުވަސް ކްރިމިނަލް ކޯޓުން ޖަހައިފިއެވެ.

ކަސްޓަމުން ބުނީ މަސްތުވާތަކެތި އަތުލައިގަތީ އިއްޔެ ބްރެޒިލުން ރާއްޖެ އައި ޢުމުރުން 21 އަހަރުގެ ފިރިހެނަކާއި 23 އަހަރުގެ އަންހެނެއްގެ ލަގެޖުންކަމަށެވެ. އެ ދެ މީހުންގެ އަތުން ޖުމްލަ 4.263 ކިލޯގެ މަސްތުވާތަކެތި އަތުލައިގެންފައިވާ ކަމަށް ކަސްޓަމުން ބުނެއެވެ.



މިމައްސަލައިގައި އެ ދެމީހުންގެ ބަންދަށް، ކްރިމިނަލް ކޯޓުން އިއްޔަ ވަނީ ފަސް ދުވަސް ޖަހާފައެވެ. އެގޮތަށް ކޯޓުން ނިންމަވާފައިވަނީ ދެމީހުންވެސް ވަކީލަކާއެކު މައްސަލަ ކުރިއަށް ގެންދިއުމަށް ބޭނުންވާތީއެވެ.

ކަސްޓަމުން ބުނީ 21 އަހަރުގެ ފިރިހެންމީހާގެ އަތުން އަތުލައިގަނެވުނު މަސްތުވާތަކެތީގެ ޖުމްލަ ބަރުދަނުގައި 1.760 ކިލޯގްރާމް ހުރިކަމަށާ ޢުމުރުން 23 އަހަރުގެ އަންހެން މީހާގެ އަތުން އަތުލައިގަނެވުނު މަސްތުވާތަކެތީގެ ބަރުދަނުގައި 2.503 ކިލޯގްރާމް ހުރިކަމަށެވެ.

ދިވެހި ކަސްޓަމުން ބުނީ މިމައްސަލާގައި އަތުލައިގަނެވުނު މަސްތުވާތަކެތީގެ މަގުމަތީ އަގު 21،315،000.00 (އެކާވީސް މިލިއަން ތިންސަތޭކަ ފަނަރަ ހާސް) ރުފިޔާއަށް އަރާކަމަށެވެ.