ހައްދުންމަތީ ގަމު ހޮސްޕިޓަލުގައި ސިޒޭރިއަންހެދި މީހެއްގެ ބަނޑުގެ ނާރެއް ބުރިވެ ޙާލު ސީރިއަސްވެފައިވަކަމަށް ޢާއިލާއިން ބުނެފިއެވެ.

އިއްޔެ ހިނގާދިޔަ މި ޙާދިސާގައި ސިޒޭރިއަން ހެދުމުގެ ތެރޭގައި ނާރެއް ބުރިވެގެން ބަނޑުތެރެއަށް ލޭފައިބައި އަންހެން މީހާއަށް މިހާރު ފަރުވާދެމުން ގެންދަނީ ވެންޓިލޭޓަރުގައި ކަމަށް ޢާއިލާއާ ޙަވާލާދީ ބައެއް މީޑިއާތަކުގައި ރިޕޯޓުކޮށްފައިވެއެވެ. ސިޒޭރިއަން ހެދުމަށްފަހު އަންހެންމީހާގެ ބަނޑު ވަރަށް ބޮޑަށް ފުއްޕަން ފެށުމުން ގަމު ހޮސްޕިޓަލުން އިންޖެކްޝަނެއް ޖެހިކަމަށާއި ނަމަވެސް ފަހުން ގޯހެއް އުޅޭކަމަށް ބަލައި ސިޒޭރިއަން ހެދިތަން މޮހާލައި ބެލިއިރު ބުރިވެފައިވާ ނާރުން ގިނަ ޢަދަދެއްގެ ލޭ ބަނޑުތެރެއަށްވަނީ ފައިބާފައެވެ.

ޢުމުރުން 37 އަހަރުގެ އެ އަންހެންމީހާގެ ހާލު ސީރިއަސްވެ ދެފަހަރެއްގެ މަތިން އެމީހާގެ ގަޔަށްވަނީ ލޭއަޅާފައެވެ. ޢާއިލާއިން ބުނީ އެމީހާގެ އެތެރެހަށީގެ ބައެއް ގުނަވަންތަކަށް ގެއްލުން ލިބިފައިވާތީ މާލެއަށް ގެންއުމަށް މަސައްކަތް ކުރަމުންދާ ކަމަށެވެ.

ސިޒޭރިއަން ހެދުމުގެ ތެރޭގައި ނާރެއް ބުރިވެ އަންހެނެއްހެ ޙާލު ސީރިއަސްވެފައިވާއިރު މިދިޔަ މަހުގެ 23 ވަނަ ދުވަހު އައްޑޫ އިކުއެޓޯރިއަލް ހޮސްޕިޓަލުގައި ސިޒޭރިއަން ހެދި މީހެއްގެ ގޮހޮރު ބުރިވި މައްސަލަ ބަލަމުންދާކަމަށް ސިއްޙަތާބެހޭ ވުޒާރާއިން މީގެ ކުރިންވަނީ ބުނެފައެވެ.

ރާއްޖޭގެ ހޮސްޕިޓަލްތަކުގައި ފަހަކަށްއައިސް އިހުމާލުގެ މައްސަލަތައް އިތުރުވެ ބައެއް މީހުންގެ ފުރާނަ ގެއްލިފައިވާއިރު އެފަދަ މައްސަލަތަކަށް ޝަރުޢީ ދާއިރާ މެދުވެރިކޮށް ބަދަލު ހޯދުމުގެ މަސައްކަތްތައްވެސް މިހާރު ދަނީ ކުރަމުންނެވެ.