ރާއްޖެއަށް މަސްތުވާތަކެތި އެތެރެކުރަން އުޅުނު ދިވެހި އަންހެނަކު އިންޑިއާއިން ހައްޔަރުކޮށްފިއެވެ.

އިންޑިއާގެ "ޓައިމްސް އޮފް އިންޑިއާ" ނޫހުން މިއަދު ރިޕޯޓުކޮށްފައިވަނީ، އިންޑިއާގެ ނާކޮޓިކްސް ކޮންޓްރޯލް ބިއުރޯއިން އުމުރުން 50 އަހަރުގެ އާމިނަތު ރަޝީދާ ކިޔާ އެ އަންހެން މީހާ ހައްޔަރުކޮށްފައިވަނީ މުމްބާއީ މަގުން ރާއްޖެއަށް ހަތަރު ކިލޯގެ އޮޕިއަމް އެތެރެކުރަން އުޅުނު ކަމުގެ ތުހުމަތުގައިކަމަށެވެ.

އިންޑިއާގެ ނޫހުގައި ބުނެފައި ވަނީ، ދިވެހި އެ އަންހެން މީހާއަކީ މިދިޔަ ޑިސެމްބަރު މަހުގެ 11 ވަނަ ދުވަހު 3.9 ކިލޯގެ އޮޕިއަމް އެތެރެކުރަން އުޅުނު މައްސަލައެއްގައި އިންޑިއާ ފުލުހުންގެ ސަމާލުކަމަށް އައި މީހެއް ކަމަށެވެ. އެގޮތުން އެމްއައިޑީސީ ޕޯސްޓް އޮފީހަށް ގެނެސްފައިވާ މަސްތުވާތަކެތި ހުރި ޕާރުސަލް އެޑްރެސްކޮށްފައިވަނީ ހައްޔަރުކުރި އަންހެން މީހާއަށް ކަމަށެވެ.

އިންޑިއާ ފުލުހުންނާ ޙަވާލާދީ ނޫހުގައި ރިޕޯޓުކޮށްފައިވަނީ އެ އަންހެންމީހާ ހައްޔަރުކުރީ ކޮޗިން އިންޓަނޭޝަނަލް އެއާޕޯޓުން ކަމަށާއި އޭނާގެ ބަންދަށް ތިން ދުވަހުގެ ޓްރާންސިޓް ބަންދެއް ޖަހާފައިވާ ކަމަށެވެ.