ޑްރަގް ކެފޭތަކުން ޢާއްމުކޮށް 1118 ދިވެހިން ޚިދުމަތް ހޯދާ ކަމަށް ފުލުހުން މިއަދު ބުނެފިއެވެ.

ފުލުހުން މިއަދު ކުރިއަށް ގެންދިޔަ މީޑިޔާ އިވެންޓުގައި ޑްރަގް ކެފޭ ތަކުން ޢާއްމުކޮށް ޚިދުމަތް ހޯދާ މީހުންގެ މަޢުލޫމާތު ހިމެނޭ ލިސްޓެއް ވަނީ ދައްކާލާފައެވެ. ފުލުހުން ބުނެފައިވަނީ ޑްރަގް ކެފޭތަކުން އާއްމުކޮށް 1118 ދިވެހިން ހިދުމަތް ހޯދާކަމަށެވެ.

އެގޮތުން ޤަވާއިދުން ހިދުމަތް ހޯދާ އުމުރުން 50 އަހަރުން މަތީގެ 56 މީހަކާއި 65 އަންހެނުން ފާހަގަވެފައިވާކަމަށް ފުލުހުން ވަނީ ބުނެފައެވެ. އޭގެ އިތުރުން 14 ކުދިންވެސް ޑްރަގް ކެފޭތަކުން ހިދުމަތް ހޯދަމުންދާ ކަމަށް ފުލުހުން ބުނެފައިވެއެވެ.

މީގެ އިތުރުން ޑްރަގް ކެފޭތަކުން ޚިދުމަތް ހޯދާ މީހުންގެ ތެރޭގައި ރިހެބިލިޓޭޝަންގެ ފަރުވާ ދިނުމަށް އަމުރު ކޮށްފައިވާ މީހުންނާއި މަސްތުވާތަކެތިން ސަލާމަތްވުމުގެ ފަރުވާއިން ވަކިކޮށްފައިވާ މީހުންނާއި އަދި ދެ ވަނަ ހުކުމެއް އައިސްފައިވާ މީހުންވެސް ހިމެނޭކަމަށް ފުލުހުން ވަނީ ބުނެފައެވެ.

ފުލުހުން ބުނީ މަސްތުވާތަކެތި ބޭނުންކުރާ ބިދޭސީންގެ ނިސްބަތްވެސް މިހާރު އިތުރުވެފައިވާ ކަމަށެވެ. އެގޮތުން ޖުމްލަ 139 ބިދޭސީއަކު ޑްރަގް ކެފޭތަކުން ހިދުމަތް ހޯދައެވެ. އެއީ ބަންގްލަދޭޝްގެ 134 މީހަކާއި އިންޑިއާގެ ތިން މީހުނާއި ލަންކާގެ ދެ މީހެކެވެ.

ފުލުހުން މީގެ ކުރިން ބުނެފައިވަނީ މާލޭގައި ކެފޭ އުސޫލުން މަސްތުވާތަކެތީގެ ޚިދުމަތްދޭ ތަންތަން މިހާރު ވަރަށް ބޮޑުތަން އިތުރުވެފައިވާ ކަމަށެވެ. އެގޮތުން ފުލުހުން ވަނީ އެކަމަށް ބޭނުންކުރަމުންއައި 34 ތަނެއް ބަންދުކޮށް އެ ޢިމާރާތްތަކުގެ ވެރިންނަށް ޤާނޫނީ އިންޒާރު ދީފައެވެ. އަދި ބައެއް ފަރާތްތަކަށް ދަޢުވާކުރަން ފޮނުވާފައިވާއިރު އޭގެތެރެއިން ބައެއް މީހުންގެ މައްޗަށް ޝަރީޢަތުގެ މަރުޙަލާވެސް މިހާރު ވަނީ ފަށާފައެވެ.