މަސްތުވާތަކެތީގެ މައްސަލައެއްގެ ތުހުމަތުގައި ހައްޔަރުކޮށްފައިވާ ދިވެހި "ރެޕް ކިންގް ޕެސްޓް" ގޭބަންދަށް ބަދަލުކޮށްފިއެވެ.

ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ހިންގި ހާއްސަ އޮޕަރޭޝަނެއްގައި ގިނަ އަދަދެއްގެ މަސްތުވާތަކެއްޗާއެކު ޒުވާނުންގެ މެދުގައި ބޮޑު މަގުބޫލުކަމެއް ހޯދާފައިވާ ސިމްބޮލިކް ރެކޯޑްސްގެ ރެޕް އާޓިސްޓް އިސްމާއިލް އިފްހާމް (ޕެސްޓް) ހައްޔަރުކޮށްފައިވަނީ މިދިޔައަހަރުގެ ފެބްރުއަރީމަހުގެ 13 ވަނަ ދުވަހުއެވެ.

ފުލުހުންގެ ބަންދުގައި އަހަރެއްހާ ދުވަސްވީ ފަހުން ކްރިމިނަލް ކޯޓުން މިއަދު ޕެސްޓް ދޫކޮށްލާފައިވަނީ ޝަރުތުތަކަކާއެކު ބޭސްފަރުވާގެ ބޭނުމަށެވެ. އެގޮތުން 60 ދުވަސް ބޭސްފަރުވާގެ ބޭނުމަށް ނޫންގޮތަށް ބޭރުގައި ނޫޅެން ޝަރުތުކޮށް ކޯޓުންވަނީ ޕެސްޓު ދޫކޮށްލާފައެވެ. އެ މައްސަލާގައި ދެން ހައްޔަރު ކޮށްފައިވާ މުހައްމަދު ސުއައިދު ވެސް މިއަދު ވަނީ ގޭ ބަންދަށް ބަދަލުކޮށްފައެވެ.

މިއަދުގެ ޝަރީޢަތުގެ އަޑުއެހުމުގައި އެކަށީގެންވާ ބޭސްފަރުވާ ނުލިބޭ ކަމަށް ޕެސްޓް ވަނީ ބުނެފައެވެ. ނަމަވެސް ދަޢުލަތުން ބުނެފައިވަނީ މިހާރު ވެސް އެކަށީގެންވާ ބޭސްފަރުވާ ޕެސްޓަށް ފޯރުކޮށްދެމުން ގެންދާ ކަމަށެވެ. އަދި އެކަމާބެހޭ ލިޔެކިޔުންތައްވެސް ދަޢުލަތުން ހުށައެޅިއެވެ. ނަމަވެސް މައްސަލަ ބައްލަވާ ޤާޟީ ނިންމެވީ 60 ދުވަހަށް ޕެސްޓް ގޭބަންދަށް ބަދަލުކުރުމަށެވެ.

މީގެ ކުރިންބޭއްވި މައްސަލައިގެ އަޑުއެހުމުގައި ޕެސްޓްވަނީ އޭނާގެ މައްޗަށް އުފުލާފައިވާ ދަޢުވާތަކަށް އިންކާރުކޮށްފައެވެ. އަދި ދައުލަތުން ވަނީ ޕެސްޓްގެ މައްޗަށް ދައުވާ ސާބިތުކުރުމަށް ހެކި ހުށަހަޅާފައެވެ. އޭގެތެރޭގައި ޑީއެންއޭ ރިޕޯޓާއި މަސްތުވާތަކެތީގެ ތަހުލީލު ރިޕޯޓްތަކުގެ އިތުރުން އެ ރިޕޯޓްތައް ތައްޔާރު ކުރި ފުލުހުން ހިމެނެއެވެ.

ޕްރޮސެކިއުޓަރ ޖެނެރަލްގެ އޮފީހުން ޕެސްޓުގެ މައްޗަށް ކޮށްފައިވަނީ ކެނެބިސް ޓްރެފިކްކުރުމުގެ ކުށުގެ ދައުވާއާއި ޑައިމޯފިން ޓްރެފިކްކުރުމުގެ ކުށުގެ ދައުވާއާއި، މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއާއި، ކެނެބިސް ބޭނުންކުރުމުގެ ކުށުގެ ދައުވާގެ އިތުރުން، ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާއެވެ. މިދައުވާތައް ސާބިތުވެއްޖެނަމަ އުމުރު ދުވަހުގެ ޖަލު ހުކުމަކާއެކު އެތައް މިލިއަން ރުފިޔާއަކުން އޭނާ ޖޫރިމަނާކުރާނެއެވެ.