ހުޅުމާލޭ ފޭސްދޭކުން މާލެއަށް ބަހުގެ ސީދާ ޚިދުމަތް އަންނަމަހު 2 ގައި ފަށާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

އެމްޓީސީސީން ހުޅުމާލޭ ދެވަނަ ފިޔަވައްސަށް މިވަގުތު ބަހުގެ ހިދުމަތް ދެނީ، ފުރަތަމަ ފޭސްގެ ބަހުގެ ހިދުމަތުގެ ތެރެއިންނެވެ. އެހެންކަމުން ހުޅުމާލޭގެ ދެވަނަ ފިޔަވައްސަށް ބަހުގައި ދިއުމަށް ފުރަތަމަ ދާންޖެހެނީ ފުރަތަމަ ފިޔަވައްސަށެވެ. ދެވަނަ ފިޔަވައްސަށް ދާނެ ބަހެއް ހޯދަންޖެހެނީ ފުރަތަމަ ފިޔަވައްސަށް ގޮސްގެންނެވެ.

އެކަމާ ގުޅިގެން އެމްޓީސީސީގެ ސީއީއޯ އާދަމް އާޒިމް ވިދާޅުވީ އަންނަ މާރޗް މަހުގެ ދެވަނަ ދުވަހުން ފެށިގެން ހުޅުމާލޭ ދެވަނަ ފިޔަވަހިން މާލެއަށް ބަސްދަތުރުގެ ސީދާ ޚިދުމަތް ފަށާނެ ކަމަށެވެ. އެގޮތުން ބާރުބޮޑުނޫން ވަގުތުތަކުގައި ބަހުގެ ޚިދުމަތް ކޮންމެ އެއްގަޑިއިރަކުން ފޯރުކޮށްދޭނެ ކަމަށް އާޒިމް ވިދާޅުވިއެވެ. އޭގެ އިތުރުން ޖުލައި މަހުން ފެށިގެން ކޮންމެ 15 މިނެޓަކުން ބަހުގެ ޚިދުމަތް ފޯރުކޮށްދޭނެކަމަށް އާޒިމް ވިދާޅުވިއެވެ.

"ޖުލައި 2022 ނިމުމުގެ ކުރިން ކޮންމެ 15 މިނެޓަކުން ބަސް އަންނާނެ." އާޒިމް ވިދާޅުވިއެވެ.

އެމްޓީސީސީން ބަހުގެ ހިދުމަތް ދެނީ ހަމައެކަނި މާލެއަކަށް ނޫނެވެ. އައްޑޫ ސިޓީ، ފުވައްމުލައް ސިޓީ އަދި ލ. އަތޮޅުގެ ބަސް ދަތުރުތައް ފެށުމަށްވެސް އެމްޓީސީސީން އަންނަނީ ތައްޔާރުވަމުންނެވެ.

އެމްޓީސީސީއަކީ ރާއްޖޭގައި އުމްރާނީ ތަރައްގީގެ މަސައްކަތުގައި އެންމެ ފާހަގަކޮށްލެވޭ ކުންފުންޏެވެ. ޕަބްލިކް ޓްރާންސްޕޯޓް އެއްގަމު ދަތުރުތަކުގެ އިތުރުން، ފެރީގެ ހިދުމަތްވެސް އެކުންފުނިން ފުޅާ ދާއިރާއެއްގައި އަންނަނީ ފޯރުކޮށްދެމުންނެވެ.