ރާއްޖޭގައި މަސައްކަތްކުރާ 59 އިންސައްތަ ނަރުހުންނަކީ ދިވެހިން ކަމަށް މޯލްޑިވްސް ހެލްތު ސްޓެޓިސްޓިކްސް 2020 ރިޕޯޓުގައި ބުނެފިއެވެ.

ސިއްޙަތާބެހޭ ވުޒާރާއިން އެކުލަވާލާފައިވާ މޯލްޑިވްސް ހެލްތު ސްޓެޓިސްޓިކްސް 2020 ނެރުމަށް މިއަދު ވަނީ ޚާއްސަ ރަސްމިއްޔާތެއް ބާއްވާފައެވެ. އެ ރިޕޯޓުން ދައްކާގޮތުން ރާއްޖޭގައި މަސައްކަތްކުރާ 59 އިންސައްތަ ނަރުހުންނަކީ ދިވެހިންނެވެ.

ސިއްޙީ ނިޒާމާއި ގުޅޭ އެންމެ ފަހުގެ މައުލޫމާތުތަކާއި ތަފާސްހިސާބު މައްޗަށް އެކުލަވާލާފައިވާ މިފޮތުގައި ހިމެނޭ މައިގަނޑު ބައިތަކުގެ ތެރޭގައި ރާއްޖޭގެ ސިއްޙީ ނިޒާމާއި އާންމު ސިއްޙަތާއި ބެހޭ މުހިންމު ތަފާސްހިސާބުތައް ހިމަނާފައިވެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ސިއްޙަތާބެހޭ ވަޒީރު އަޙްމަދު ނަސީމް ވިދާޅުވީ ދުނިޔޭގައި އުޅޭއިރު ކުރިމަތިވާ ކަންކަމުން އިބްރަތް ހާސިލްކުރަންޖެހޭ ކަމަށެވެ. އެގޮތުން ކޯވިޑް-19 ނިމިއްޖެ ކަމަށްބުނެ އަތްފޮޅާލެވެން އަދިނެތްކަމަށް މިނިސްޓަރ ނަސީމް ވިދާޅުވިއެވެ. ހަމައެއާއެކު ތަފާސްހިސާބުތަކުން އެއްކުރެވޭ މަޢުލޫމާތަކީ މުސްތަޤުބަލް ރޭވުމަށް ލިބޭ ބާރެއްކަމަށްވެސް އެމަނިކުފާނު ވިދާޅުވިއެވެ.

މިއަދު ޢާއްމުކުރި ރިޕޯޓުގައިވާ ތަފާސްހިސާބުތައް ދައްކާ ގޮތުން ރާއްޖޭގައި މަސައްކަތްކުރާ 40 އިންސައްތަ ޑޮކްޓަރުންނަކީ ސްޕެޝަލިސްޓް ޑޮކްޓަރުންނެވެ. އަދި ނަރުހުންގެ ތެރެއިން 59 އިންސައްތަ ނަރުހުންނަކީ ދިވެހިންނެވެ. އޭގެ އިތުރުން 2020 ވަނަ އަހަރު ރާއްޖޭގެ ސިއްހީ ޚިދުމަތްފޯރުކޮށްދޭ މަރުކަޒު ތަކުގައި 50 އިންސައްތައަށްވުރެ ގިނަ އަންހެނުން ވިހާފައިވަނީ ސިޒޭރިއަން ހަދައިގެންނެވެ. ސިއްޙަތާބެހޭ ވުޒާރާއިން ބުނީ، މި ހޯދުންތަކުގެ އަލީގައި ސިއްޙީ ދާއިރާ އިތުރަށް ހަރުދަނާ ކުރުމަށްޓަކައި މުހިއްމު ސިޔާސަތުތައް ކަނޑައެޅުމަށް މަގުފަހި ވެގެންދާނެކަމަށެވެ.

މިއަދު ބޭއްވި ޚާއްސަ ރަސްމިއްޔާތެއްގައި މި ރިޕޯޓު ނެރެދެއްވާފައިވަނީ ސްޕެޝަލް އެޑްވައިޒަރ އޮން ސޯޝަލް ޕޮލިސީ ޑރ. މުސްތަފާ ލުތުފީއެވެ.