ރަމަޟާން މަހަށް ސްޓެލްކޯގެ އިންޖީނުގެތައް ޒީނަތްތެރި ކުރުމުގެ މަސައްކަތް ފަށާފައިވާކަމަށް އެކުންފުނިން ހާމަކޮށްފިއެވެ.

ސްޓޭޓް އިލެކްޓްރިކް ކޮމްޕެނީ ސްޓެލްކޯއިން ބުނީ ރޯދަމަހަށް ތައްޔާރުވުމަށް އެކުންފުނީގެ އަތޮޅުތެރޭ އިންޖީނުގެތަކުން ގިނަ މަސައްކަތްތަކެއް ކުރަމުންގެންދާކަމަށެވެ. އެގޮތުން ނެޓްވޯކް އަޕްގްރޭޑް ކުރުމާއި، ޖަނަރޭޓަރު އޯވާހޯލް ކުރުމުގެ މަސައްކަތްތައްވެސް ކުރަމުންދާކަމަށް އެ ކުންފުނިން ވަނީ ބުނެފައެވެ.

ސްޓެލްކޯއިން އިތުރަށް ބުނީ ރަމަޟާން މަހަށް ތައްޔާރުވުމަށް އެކުންފުނީގެ އިންޖީނުގެތައް ޒީނަތްތެރިކުރުމުގެ ތަފާތު މަސައްކަތްތަކެއްވެސް ދަނީ ކުރެވެމުން ކަމަށެވެ.

"އެގޮތުން، ހިންމަފުށީ އިންޖީނުގޭގެ ވޯކްވޭގައި ކުލަލައި މިހާރު ވަނީ އިންޖީނުގެއަށް އިތުރު ފުރިހަމަކަމެއް ގެނެސްދެވިފައި." ސްޓެލްކޯއިން ބުނެފައިވެއެވެ.

ސްޓެލްކޯގެ މެނޭޖިންގ ޑިރެކްޓަރގެ މަޤާމަށް އަހުމަދު ޝަރީފް އައްޔަނުކުރެއްވިފަހުން ގެންދަވަނީ ކުންފުނީގެ ހިންގުން އިތުރަށް ހަރުދަނާ ކުރަށްވައި މުވައްޒަފުންގެ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރަށްވަމުންނެވެ.

ޝަރީފް ވިދާޅުވެފައިވަނީ ސްޓެލްކޯގެ ހިންގުން އަމާޒު ކުރައްވާނީ ރައީސް ޞާލިޙްގެ އިރުޝާދާއެކު ރައްޔިތުންނާއި ވީހާވެސް ގާތުން މަސައްކަތްކުރުމަށް ކަމަށެވެ. އަދި ރައްޔިތުން އެދޭފަދަ ހިދުމަތެއް ފޯރުކޮށްދިނުމުގެ ތަސައްވުރާއި، މުވައްޒަފުންގެ ކަންބޮޑުވުންތަކަށް ހައްލު ހޯދައިދިނުމުގެ އަމާޒަށް މަސައްކަތް ކޮށްދޭނެ ކަމުގެ ޔަގީންކަން ޝަރީފު ދެއްވާފައިވެއެވެ.