މި ސަރުކާރުން އައްޑޫ ސިޓީގައި ހިންގެވި ޖުމުލަ 565 މިލިއަން ރުފިޔާގެ އެކި މަޝްރޫއުތައް އިފްތިތާހު ކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އައްޑޫ ސިޓީއަށް މިއަދު ވަޑައިގަންނަވައިފިއެވެ.

އެމަނިކުފާނު އައްޑޫ ސިޓީއަށް ވަޑައިގެންނެވުމުން ދެ ޖިންސްގެ ކުދިބޮޑު ގިނަ ބަޔަކުވަނީ އެމަނިކުފާނަށް މަރުހަބާ ދެންނެވުމަށް ނުކުމެފައެވެ.

ރައީސްގެ މި ދަތުރުފުޅުގައި މި ސަރުކާރުން އައްޑޫ ސިޓީގައި ހިންގަވާފައިވާ މުހިންމު ގިނަ މަޝްރޫއުތަކެއް އިފްތިތާހު ކޮށްދެއްވާނެއެވެ. އެގޮތުން، އައްޑޫ ސިޓީގައި ގާއިމްކޮށްފައިވާ ނެޝަނަލް ކޮލެޖް އޮފް ލޯ އެންޑް އެންފޯސްމަންޓް ހުޅުއްވައިދެއްވުމަށް ވަނީ ހަމަޖެހިފައެވެ. އަދި މިރޭ އެ ކޮލެޖުގައި އޮންނަ ރަސްމިއްޔާތެއްގައި އައްޑޫގެ ބިން ހިއްކުމުގެ މަޝްރޫއުގެ އެއްބަސްވުމުގައި ސޮއިކުރުން އޮންނާނެއެވެ. އަދި އައްޑޫ ސިޓީގެ މަގު ހެދުމުގެ މަޝްރޫއުވެސް ރައީސް ފައްޓަވައިދެއްވަން ވަނީ ހަމަޖެހިފައެވެ.

މީގެ އިތުރުން އައްޑޫ ސިޓީ މަރަދޫގެ ބަނދަރު ހުޅުވުމުގެ ރަސްމިއްޔާތު ވެސް އެ ރަށުގައި މާދަމާ ބޭއްވުމަށް ހަމަޖެހިފައިވާއިރު މަރަދޫ ސުކޫލްގައި އަލަށް އިމާރާތްކުރި 12 ކުލާސް ރޫމް ވެސް އިފްތިތާހު ކޮށްދެއްވާނެއެވެ. އަދި މަރަދޫފޭދޫއަށް ވަޑައިގެން އެ ރަށުގެ ބަނދަރު ހުޅުއްވައިދެއްވުމަށް ވެސް ވަނީ ހަމަޖެހިފައެވެ.

ރައީސް އައްޑޫ ސިޓީއަށް ކުރައްވަމުން މި ގެންދަވާ ދަތުރުފުޅު ނިންމަވާލެއްވުމަށް ހަމަޖެހިފައިވަނީ ހޯމަ ދުވަހުއެވެ. ނަމަވެސް ދަތުރުފުޅު ނިންމަވާލެއްވުމުގެ ކުރިން ހިތަދޫ އަވަށުގައި އެމަނިކުފާނުގެ ފަރާތްޕުޅުން އައްޑޫ ސިޓީގެ ރައްޔިތުންނަށް ދެއްވާ މާހެފުމެއް ބޭއްވުމަށް އޮތީ ހަމަޖެހިފައެވެ.