ސްޓެެލްކޯއަށް ސައިބަރއެޓޭކް ދީފައިވަނީ ބަޔަކަށް އަގުދީގެން ކަމަށް ޤަބޫލުކުރެވޭކަމަށް އެކުންފުނީގެ މެނޭޖިންގ ޑިރެކްޓަރ އަހުމަދު ޝަރީފް މިއަދު ވިދާޅުވެއްޖެއެވެ.

ރެންސަމް ވެއަރ އެޓޭކަކާއި ގުޅިގެން ސްޓޭޓް އިލެކްޓްރިކް ކޮމްޕެނީ، ސްޓެލްކޯގެ ވެބްސައިޓާއި، މޯބައިލް އެޕްލިކޭޝަނާއި، މޯބައިލް އައުޓްލެޓްތަކާއި، އަދި ކައުންޓަރުތަކުން ދެމުންއައި ހުރިހާ ހިދުމަތެއް ބުރާސްފަތި ދުވަހުން ފެށިގެން ވަނީ މެދުކެނޑިފައެވެ.

ސައިބަރ އެޓޭކާއި ގުޅިގެން "ރަސް އޮންލައިން"އާ ވާހަކަދައްކަވަމުން ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވީ ސްޓެލްކޯއަށް ދިން ސައިބަރ ހަމަލާއަކީ އަގުދީގެން ކުރުވާފައިވާ ކަމެއްކަމަށް ޤަބޫލުކުރެއްވޭ ކަމަށެވެ. އެމައްސަލަ ފުލުހަށް ހުށައަޅުއްވާނެ ކަމަށާއި މުޅި މައްސަލައިގެ މަންޒަރު ސާފުވާނީ ފުލުހުންގެ ތަޙުޤީޤަށްފަހު ކަމަށް ޝަރީފް ވިދާޅުވިއެވެ.

"އަދި އެކަން ސާފުކޮށް ދަންނަވާކަށް ނޭނގޭ. މިއަދު މި މައްސަލަ ފުލުހުންނަށް ހުށައަޅާނަން. ފުލުހުންގެ ތަޙުޤީޤަށްފަހު ކިހިނެއް ކޮންބަޔަކު ކޮން މަޤްޞަދެއްގައި ކުރިކަމެއްތޯ ރަނގަޅަށް ސާފުވެގެން ދާނީ." ޝަރީފް ވިދާޅުވިއެވެ.

ޝަރީފް ވިދާޅުވީ ރައްޔިތުންނަށް ކުންފުނިން ދެމުންދާ ޚިދުމަތްތަކަށް ބުރޫ ނާރާނެ ގޮތަކަށް މިހާރުން މިހާރަށް މަސައްކަތްތައް ތާވަލުކުރަމުން ގެންދާ ކަމަށެވެ. ނަމަވެސް ވަރަށް ބޮޑު ގެއްލުންތަކެއް ލިބިއްޖެ ކަމަށާއި ގެއްލުން ކުޑަކުރެވުނީ ބެކަޕް ނަގާފައި ހުރުމުންކަމަށް ޝަރީފް ވިދާޅުވިއެވެ.

"ދެން އަޅުގަނޑުމެން ތައްޔާރުވާނީ މިފަދަ ޙަމަލާތަކަށް ސަމާލުވެގެން ރެކެވޭނެ އެންމެހާ ގޮތްތަކާއެކީ ފިޔަވަޅުތައް ވަރުގަދަ ކޮށްގެން." ޝަރީފް ވިދާޅުވިއެވެ.

ސްޓެލްކޯއިން ބުނީ މި އެޓޭކާއި ގުޅިގެން، ކުންފުނީގެ އައިޓީ ނެޓްވޯކަށް ދިމާވެފައިވާ މައްސަލަ ހައްލުކޮށް، ކަސްޓަމަރުންނަށް އޮންލައިންކޮށާއި، ކައުންޓަރުތައް މެދުވެރިކޮށް ދެމުންއައި ހިދުމަތްތައް އަލުން ފޯރުކޮށް ދިނުމަށް އަދިވެސް އިތުރުވަގުތު ނަގާނެކަމަށް ބެލެވޭކަމަށެވެ.

މި މައްސަލަ ވީ އެންމެ އަވަހަކަށް ހައްލު ކުރުމަށްޓަކައި، ސްޓެލްކޯގެ އައިޓީ އިންޖީނިއަރުން ދަނީ ކެނޑިނޭޅި މަސައްކަތް ކުރަމުން ކަމަށާއި މިކަމުގެ ސަބަބުން ކަސްޓަމަރުންނަށް ދިމާވާނެ ދަތިތަކަށް ނިހާޔަތަށް މާފަށް އެދޭކަމަށްވެސް ސްޓެލްކޯއިން ބުނެއެވެ.