ސްޓޭޓް އިލެކްޓްރިކް ކޮމްޕެނީ ލިމިޓެޑް ސްޓެލްކޯގެ ބައެއް ހިދުމަތްތައް ހެޑް އޮފީހުން ލިބޭ ގޮތަށް ހަމަޖައްސައިފިއެވެ.

ސްޓެލްކޯއިން އިއްޔެ ބުނީ ރެންސަމްވެއަރ އެޓޭކަކާއި ގުޅިގެން އެ ކުންފުނީގެ ވެބްސައިޓާއި، މޯބައިލް އެޕްލިކޭޝަނާއި، މޯބައިލް އައުޓްލެޓްތަކާއި، އަދި ކައުންޓަރުތަކުން ދެމުންއައި ހުރިހާ ހިދުމަތެއް ބުރާސްފަތި ދުވަހުން ފެށިގެން ވަނީ މެދުކެނޑިފައިކަމަށެވެ. ރެންސަމް އެޓޭކަކީ ފައިސާއަށް ޑިމާންޑްކޮށްފައި ދޭ ހަމަލާތަކެކެވެ.

މައްސަލަ ޙައްލު ކުރުމަށް ކުރަމުންދާ މަސައްކަތުގެ މަޢުލޫމާތު ހާމަކޮށް ސްޓެލްކޯއިން ބުނީ ރެންސަމްވެއަރ އެޓޭކާއި ގުޅިގެން މެދުކެނޑިފައިވާ ކުންފުނީގެ ޚިދުމަތްތައް އަލުން ފެށުމުގެ މަސައްކަތްތައް ދަނީ ކުރެވެމުން ކަމަށެވެ. އެގޮތުން ޚިދުމަތްތަކަށް އެދި ފޯމް ހުށަހެޅުމާއި، ބިލް ދެއްކުމުގެ އިންތިޒާމްތައް މިހާރު ވަނީ ހެޑް އޮފީހުން ހަމަޖެހިފައިކަމަށް ސްޓެލްކޯއިން ވަނީ ބުނެފައެވެ.

'މީގެ އިތުރުން މިކުންފުނީގެ ވެބްސައިޓާއި މޯބައިލް އެޕްލިކޭޝަން މެދުވެރިކޮށް އޮންލައިންކޮށް ދެމުންއައި ޚިދުމަތްތަކާއި، ރަށްރަށުން ފޯރުކޮށްދެމުން އައި ޚިދުމަތްތައް މާތްﷲގެ އިރާދަފުޅާއެކު މާދަމާ އަލުން ފެށުމުގެ މަސައްކަތްތައް އަންނަނީ ކުރެވެމުން." ސްޓެލްކޯއިން ބުނެފައިވެއެވެ.

ސްޓެލްކޯއިން ބުނީ މި އެޓޭކާއި ގުޅިގެން، ކުންފުނީގެ އައިޓީ ނެޓްވޯކަށް ދިމާވެފައިވާ މައްސަލަ ހައްލުކޮށް، ކަސްޓަމަރުންނަށް އޮންލައިންކޮށާއި، ކައުންޓަރުތައް މެދުވެރިކޮށް ދެމުންއައި ހިދުމަތްތައް އަލުން ފޯރުކޮށް ދިނުމަށް އަދިވެސް އިތުރުވަގުތު ނަގާނެކަމަށް ބެލެވޭކަމަށެވެ.

މި މައްސަލަ ވީ އެންމެ އަވަހަކަށް ހައްލު ކުރުމަށްޓަކައި، ސްޓެލްކޯގެ އައިޓީ އިންޖީނިއަރުން ދަނީ ކެނޑިނޭޅި މަސައްކަތް ކުރަމުން ކަމަށާއި މިކަމުގެ ސަބަބުން ކަސްޓަމަރުންނަށް ދިމާވާނެ ދަތިތަކަށް ނިހާޔަތަށް މާފަށް އެދޭކަމަށްވެސް ސްޓެލްކޯއިން ބުނެއެވެ.