އައްޑޫ ސިޓީގައި ކުޑަކުއްޖަކަށް ޖިންސީ ގޯނާކުރި މައްސަލައިގައި ރައްޔިތުންގެ ތުހުމަތުތަކަށް ވެސް ބަލާލުން ރަނގަޅުކަމަށް އައްޑޫ ސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.

އައްޑޫ ސިޓީގައި 6 އަހަރުގެ ކުއްޖަކަށް ޖިންސީ ގޯނާ ކުރި ކަމަށް ތުހުމަތުކުރެވޭ މައްސަލައެއްގައި އިއްޔެ 59 އަހަރުގެ އަންހެނަކު ވަނީ ހައްޔަރު ކޮށްފައެވެ. ފުލުހުން ހައްޔަރުކޮށްފައިވާ 59 އަހަރުގެ އަންހެނަކީ އެކުއްޖާ ތައުލީމް ހާސިލްކުރާ ސްކޫލްގައި 30 އަހަރަށްވުރެ ގިނަ ދުވަހު މަސައްކަތު މީހެއްގެ ވަޒީފާ އަދާކުރަމުން އަންނަ މީހެކެވެ.

ޖިންސީ ގޯނާގެ ޝިކާރައަކަށްވި 6 އަހަރުގެ ކުޑަކުއްޖާއަށް ޖިންސީ ގޯނާކުރީ ކާފަ ކަމަށް އެ ކުއްޖާ ތަހުގީގަށް ކިޔައިދީފައިވާކަމަށް އެ މައްސަލާގައި ހައްޔަރުކުރި އަންހެން މީހާގެ އާއިލާއިން އަންނަނީ ބުނަމުންނެވެ.

މިކަމާއި ގުޅިގެން އައްޑޫގެ މޭޔަރު ޢަލީ ނިޒާރު ވިދާޅުވީ ރައްޔިތުންގެ ކަންބޮޑުވުން އޮތް މިފަދަ މައްސަލައެއްގައި ފުލުހުން، ރައްޔިތުންނަށް ދެވެންއޮތް މިންވަރަކުން މަޢުލޫމާތު ދޭންޖެހޭކަމަށެވެ. އަދި ޖެންޑަރ މިނިސްޓްރީންވެސް މިކަމުގައި އެއްބާރުލުން ދޭންޖެހޭކަމަށް މޭޔަރު ވިދާޅުވިއެވެ.

އަދި މި މައްސަލައާއި ގުޅިގެން ރައްޔިތުން ކުރަމުންދާ ތުހުމަތުތަކަށް ވެސް ބަލާލުން ރަނގަޅުކަމަށް، ހޯމް މިނިސްޓަރ އިމްރާން ޢަބްދުﷲ އާއި މިނިސްޓަރ އާއިޝަތު މުޙައްމަދު ދީދީ ޓެގް ކުރައްވާ ކުރެއްވި ޓްވީޓްގައި ނިޒާރު ވިދާޅުވެފައިވެއެވެ.

މި މައްސަލައާއި ގުޅިގެން އައްޑޫ ސިޓީ ކައުންސިލުން ނެރުނު ބަޔާނެއްގައި ވަނީ ކުޑަކުދިންނަށްކުރާ މިފަދަ ގޯނާތަކަކީ ސީރިއަސް މައްސަލަތަކެއް ކަމަށާއި އެހެންކަމުން މި މައްސަލަ ސީރިއަސް މައްސަލައެއްގެ ގޮތުގައި ބަލައި އެކަމުގައި ޝާމިލުވާ އެންމެންގެ މައްސަލަތައް ވަކިވަކިން ތަހުގީގުކޮށް ދިނުމަށް ކަމާބެހޭ ފަރާތްތަކަށް ގޮވާލާފައެވެ.