މި ސަރުކާރުން ގދ. ފަރެސްމާތޮޑާގައި ތަރައްގީކުރާ އެއަރޕޯޓުގެ މަސައްކަތުގެ ތެރެއިން ރަންވޭގައި ތާރު އެޅުމުގެ މަސައްކަތް މިހާރު ފަށާފައިވާ ކަމަށް ސަރުކާރުން ހާމަކޮށްފިއެވެ.

ސަރުކާރުން މި މަޝްރޫއުގެ މަސައްކަތްތައް ހަވާލު ކޮށްފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މިއަދު ބުނީ، ފަރެސްމާތޮޑާ އެއަރޕޯޓް ތަރައްގީ ކުރުމުގެ މަޝްރޫއުގެ ދަށުން، އެއަރޕޯޓް ރަންވޭގައި ތާރު އެޅުމުގެ މަސައްކަތް މިހާރު ފެށިގެން ކުރިޔަށް ދާކަމަށެވެ.

ރަންވޭގައި ތާރު އެޅުމުގެ މަސައްކަތް ފަށައިގެން ކުރިއަށްދާ އިރު، ސަބްގްރޭޑް މަސައްކަތްތަކާއި އޭބީސީ މަސައްކަތްތައް މިދިޔަ ފެބްރުއަރީ މަހުގެ ތެރޭގައި ވަނީ ނިންމާލައިފައެވެ.

މުޅި މަޝްރޫއަށް ބަލާއިރު، މި މަޝްރޫއުގެ ދަށުން ރަންވޭގެ ސަބްގްރޭޑް އަދި ސަބްބޭސް މަސައްކަތާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ގާއިމު ކުރުމާއި، ފަޔަރ ބިލްޑިންއެއް އިމާރާތް ކުރުމާއި އަދި ޓާރމިނަލް ބިލްޑިންއެއް އިމާރާތް ކުރުމުގެ މަސައްކަތް ހިމެނެއެވެ.

އެތެރޭގެ އުދުހުންތަކަށް ހާއްސަ ކޮށްގެން ތަރައްގީކުރާ ފަރެސްމާތޮޑާ އެއަރޕޯޓަކީ 144.8 މިލިއަން ރުފިޔާގެ މަޝްރޫއެކެވެ. މި އެއަރޕޯޓަކީ ކުރީ ސަރުކާރުން އެއަރޕޯޓަށް ބޭނުންވާ ބިން ހިއްކުމުގެ މަސައްކަތް އަމިއްލަ ކުންފުންޏަކާ ހަވާލު ކުރި މަޝްރޫއެކެވެ.

ނަމަވެސް އެ ކުންފުނީގެ ބަދަލުގައި މި މަޝްރޫއު މި ސަރުކާރުން ހަވާލު ކުރީ އެމްޓީސީސީއާއެވެ. އެގޮތުން 2020 ވަނަ އަހަރުގެ ނޮވެންބަރު މަހުގެ ތެރޭގައި އެމްޓީސީސީން ވަނީ މި މަޝްރޫއުގެ އަމަލީ މަސައްކަތް އަލުން ފަށާފައެވެ.