އައްޑޫ ބިން ހިއްކުމުގެ މަޝްރޫޢުގެ އަމަލީ މަސައްކަތް ފެށޭނީ ތިން ހަތަރު މަސް ފަހުން ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާންސްޓްރަކްޗާ މުހައްމަދު އަސްލަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މަރަދޫ ދާއިރާގެ މެންބަރު އިބްރާހިމް ޝަރީފް ކުރެއްވި ސުވާލަކަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ އައްޑޫސިޓީގައި ބިން ހިއްކުމުގެ އަމަލީ މަސައްކަތް ފަށަން އަދި ތިން ހަތަރު މަހެއްހާ ދުވަސް ނަގާނެ ކަމަށެވެ. މިނިސްޓަރ ވިދާޅުވީ އައްޑޫގެ ބިން ހިއްކުމުގެ މަޝްރޫޢުގެ ކޮންޓްރެކްޓްގައި ސޮއި ކުރެވުނީވެސް އެވޯޑުކުރެވުނުތާ ވަރަށް ދުވަސް ފަހުން ކަމަށެވެ.

މިނިސްޓަރު ވިދާޅުވީ އެ މަޝްރޫއުގެ ދަށުން މިހާރު ކުރަމުން އަންނަނީ އައްޑޫގެ އެތެރެވަރިން ވެލި ނަގަން ހުރި ތަންތަނުގެ ސޭންޑް ސާޗް ސާވޭގެ މަސައްކަތް ކަމަށެވެ. އަދި މަސައްކަތުގެ ޢަމަލީބައި ލަސްވަމުންދަނީ އައްޑޫގެ ބިން ހިއްކުމާއި ގުޅޭގޮތުން ހެދި އީއައިއޭއިން ފާހަގަކުރެވުނު ގިނަ ކަންތައްތަކުގެ ސަބަބުން ކަމަށް މިނިސްޓަރ އަސްލަމް ވިދާޅުވިއެވެ.

އައްޑޫ ބިން ހިއްކުމުގެ މަޝްރޫޢު ހަވާލުކޮށްފައިވަނީ ނެދާލޭންޑްސްގެ ކުންފުންޏެއް ކަމުގައިވާ ވެން އޫޑްއާއެވެ. މިމަޝްރޫއުގެ ދަށުން އައްޑޫސިޓީން 194.3 ހެކްޓަރުގެ ބިން ހިއްކުމަށް ވަނީ ހަމަޖެހިފައިވެއެވެ.

ސަރުކާރުން ބުނެފައިވަނީ އައްޑޫ ބިން ހިއްކުމުގެ މަޝްރޫއާއި ހިއްކާ ސަރަހައްދު ހިމާޔަތް ކުރުމަށް 1.3 ބިލިއަން ރުފިޔާ ހަރަދު ކުރުމަށް ހަމަޖެހިފައިވާ ކަމަށެވެ.

އައްޑޫ ބިން ހިއްކުމަށް މަޝްރޫޢުގެ ދަށުން ހިންގާ މަސައްކަތްތަކަކީ، ހިތަދޫން 90 ހެކްޓަރުގެ ބިން ހިއްކުމާއި، ހުޅުމީދޫން 23.3 ހެކްޓަރުގެ ބިން ހިއްކުމާއި، ހުޅުމީދޫ ކައިރީގައި ޓޫރިޒަމަށް ހާއްސަކޮށްގެން ފަސް ހެކްޓަރުގެ ދެ ރަށް ހިއްކުމާއި، މަރަދޫ / މަރަދޫފޭދޫން 76 ހެކްޓަރުގެ ބިން ހިއްކުމާއި، ޓޫރިޒަމަށް ހާއްސަކޮށްގެން 8.3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކުމެވެ.

އައްޑޫ ބިން ހިއްކުމުގެ މަސައްކަތް 18 މަސް ދުވަހުގެ ތެރޭގައި ނިންމުމަށް ހަމަޖެހިފައިވާއިރު މިމަސައްކަތްކުރުމަށް ހަމަޖެހިފައިވަނީ އިންޑިއާގެ އެގްޒިން ބޭންކުން ހަމަޖައްސާފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ތެރެއިންކަމަށް ސަރުކާރުން ވަނީ ބުނެފައެވެ.