ރާއްޖެ އެތެރެކުރި 130 ކިލޯ މަސްތުވާތަކެތީގެ މައްސަލާގައި ދައުލަތުން ދައުވާކުރާ އިސް ދެ މީހުން ކްރިމިނަލް ކޯޓުން މިއަދު ދޫކޮށްލައިފި އެވެ.

2020ވަނަ އަހަރުގެ އޮކްޓޫބަރު މަހުގެ 12ވަނަ ދުވަހު ކަންނެލި ދޯންޏެއްގައި އެތެރެކުރި މަސްތުވާތަކެތީގެ މައްސަލާގައި އެންމެ އިސްކޮށް ހަރަކާތްތެރިވި ކަމަށް ތުހުމަތު ކުރާ ޕީއެންސީގެ ކައުންސިލް މެމްބަރު ޝަހީބް އިބްރާހިމާއި ހއ. ހޯރަފުށީ ވައިލެޓްވިލާ އަހުމަދު މޫސާ ބަންދުން ދޫކޮށްލަން ކްރިމިނަލް ކޯޓުން އަމުރުކުރީ ބޭސްފަރުވާއަށް ޓަކައެވެ. އެ މައްސަލާގައި ކްރިމިނަލް ކޯޓުގައި މިއަދު ބޭއްވީ ބަންދު މުރާޖައާ އަޑުއެހުމެކެވެ.

މިއަދުގެ އަޑުއެހުމުގައި ޝަހީބް ބުނެފައިވަނީ އޭނާއަށް ނަފްސާނީ މައްސަލަތަކެއް ދިމާވެފައިވާ ކަމަށާއި މައިބަދައިގެ ދެ ޑިސްކް ގުޑާފައިވާ ކަމަށެވެ. އަދި އަހުމަދު މޫސާ ބުނެފައިވަނީ އޭނާގެ ނޭވާލާ ނިޒާމަށް މައްސަލަތަކެއް ދިމާވެ، ޓެސްޓްތަކެއް ހަދަން ޖެހޭކަމަށާއި ޓެސްޓުތައް ނުހެދި ދެމަސްވެފައިވާ ކަމަށެވެ.

ދަޢުލަތުން މިއަދުގެ އަޑުއެހުމުގައި އެދިފައިވަނީ ޝަހީބާއި އަޙްމަދު މޫސަގެ ބަންދު ދެމެހެއްޓުމަށެވެ. އެހެންނަމަވެސް ދަޢުލަތުންވެސް ވަނީ ކަރެކްޝަންސް އޮފިސަރުންގެ ދަތިކަން ހުރުމުން އެމީހުން ޑޮކްޓަރަށް ދެއްކުމުގައި ލަސްތަކެއް ވެފައިވާކަމަށް އެއްބަސްވެފައެވެ.

ދެފަރާތުގެ ވާހަކަތަކަށް ރިޢާޔަތް ކުރެއްވުމަށްފަހު މައްސަލަ ބައްލަވާ ޤާޟީ އަހުމަދު ޝަކީލް ނިންމެވީ އެމީހުން ބަންދުން ދޫކޮށްލުމަށެވެ. ކްރިމިނަލް ކޯޓުން އެދެމީހުން ދޫކޮށްލާފައިވަނީ ރާއްޖޭން ބޭރަށް ނުދިއުމަށާއި މާލެއިން ބޭރަށް ނުދިއުމާއި ރޭގަނޑު ގެއިން ބޭރަށް ނުނިކުތުމުގެ އިތުރުން ކޯޓަށް އެއްބާރުލުން ދިނުމަށް ޝަރުތުކުރުމަށްފަހު ދެމަސްދުވަހުގެ މުއްދަތަށެވެ.



ޝަހީބް އިބްރާހީމާއި އަހްމަދު މޫސާގެ އިތުރުން 130 ކިލޯގެ މަސްތުވާތަކެތީގެ މައްސަލައިގައި ކްރިމިނަލް ކޯޓުގައި ދައުވާކޮށްފައިވަނީ، ގއ. ވިލިނގިލި، ދުންފިނިގެ، އަސީލް މާހިރާއި ޅ. ހިންނަވަރު، ސެލް، އަނަސް ހުސައިންގެ އިތުރުން، ބަންގްލަދޭޝް ދެ މީހެއް ކަމަށްވާ މުހައްމަދު ރިޔާޒާއި އިގްބާލްގެ މައްޗަށެވެ.

މަސްތުވާތަކެތީގެ ބޮޑު ނެޓުވޯކެއްގެ އިސްވެރިޔެއް ކަމަށް ފުލުހުން ތުހުމަތުކުރާ ޕީއެންސީގެ ކައުންސިލް މެމްބަރު ގއ. ވިލިނގިލި، ލައިޓްހައުސް ޝަހީބު އިބްރާހީމާއި އޭގެ ޑްރަގް ނެޓްވޯކްގެ ބައިވެރިންގެ މައްޗަށް 75 އަހަރުގެ ޖަލު ހުކުމެއް އަންނަ ވަރުގެ ތިން ދައުވާއެއް ޕީޖީ އޮފީހުން އުފުލާފައިވެއެވެ.

ޕީޖީ އޮފީހުން އެމީހުންގެ މައްޗަށް އުފުލާފައިވާ ދައުވާތަކަކީ، ޑައިމޯފިން ޓްރެފިކް ކުރުމާއި، މަސްތުވާތަކެތީގެ ގާނޫނުގެ ޖަދުވަލު އެކެއްގައިވާ މަސްތުވާތަކެއްޗެއް ޓްރެފިކް ކުރުމާއި، މަސްތުވާތަކެތީގެ ގާނޫނުގެ ޖަދުވަލު އެކެއްގައިވާ މަސްތުވާ އެއްޗެއް ރާއްޖެ އެތެރެކުރުމުގެ ދަޢުވާއެވެ. މީގެން ކޮންމެ ދަޢުވާއެއްގެ އަދަބަކީ 25 އަހަރަށް ޖަލަށް ލުމާއެކު 100،000 ރުފިޔާއާއި 10 މިލިއަން ރުފިޔާއާ ދެމެދުގެ އަދަދަކު ޖޫރިމަނާކުރުމެވެ. އެހެންކަމުން މި ދަޢުވާތައް އޭނާގެ މައްޗަށް ސާބިތުވެއްޖެނަމަ 75 އަހަރުގެ ޖަލު ޙުކުމެއް އިއްވާނެއެވެ.

2020 ވަނަ އަހަރު އޮގަސްޓް މަހު ރާއްޖެ އެތެރެކުރި 130 ކިލޯގެ މަސްތުވާތަކެތީގެ މައްސަލާގައި ހައްޔަރުކުރި މީހުންގެ ތެރޭގައި ހިިމެނޭ ޝަހީބް ބަންދުގައި ބެހެއްޓުމަށް ފަހު ކްރިމިނަލް ކޯޓުން ޝަރުތުތަކާ އެކު މީގެ ކުރިންވެސް ބަންދުން ދޫކޮށްލިއެވެ. އެކަމަކު ޕްރޮސެކިއުޓާ ޖެނެރަލްގެ އޮފީހުން އެ މައްސަލަ ހައިކޯޓުގައި އިސްތިއުނާފް ކުރުމުން ހައިކޯޓުން ވަނީ ޝަރީއަތް ނިމެންދެން ޝަހީބު ބަންދުގައި ބެހެއްޓުމަށް އަމުރުކޮށްފައެވެ. އަދި ސުޕްރީމް ކޯޓުންވެސް ވަނީ ހައިކޯޓުގެ ޙުކުމަށް ތާޢީދުކޮށްފައެވެ.

ޝަހީބް އިބްރާހިމަކީ 2019 ނޮވެމްބަރު މަހުގެ ތެރޭގައި ރާއްޖެއަށް މަސްތުވާތަކެތި އެތެރެކުރާކަމަށް ތުހުމަތުކުރެވޭ މައްސަލައަކާއި ގުޅިގެން ރާއްޖޭގެ ކަނޑުގެ ސަރަހައްދު ތެރެއިން ފުލުހުންގެ ބެލުމުގެ ދަށަށް ގެނައި އިރާން ބޯޓުގެ މައްސަލައާ ގުޅުން އޮތް ފަރާތެއްކަމަށް ފުލުހުން ބުނެއެވެ. އަދި ރާއްޖެއަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ހިފެހެއްޓި އިރާން ބޯޓުން ހައްޔަރުކުރި 7 މީހުންނާއި ޖާމިނު ވެފައިވަނީ ޝަހީބް އިބްރާހިމްކަމަށްވެސް ފުލުހުން ބުނެއެވެ. އަދި އެމައްސަލާގައި ޝަހީބް އިބްރާހިމް އާއި ޖާމިނުކޮށް އީރާން 7 މީހުން ކްރިމިނަލް ކޯޓުން ބަންދުން ދޫކޮށްލާފައިވާކަން ފުލުހުން ފާހަގަކުރެއެވެ.