ރައީސުލްޖުމްހޫރިއްޔާގެ އޮފީހާއި ރައީސުލްޖުމްހޫރިއްޔާގެ ރަސްމީގެއާއި ރައީސުލްޖުމްހޫރިއްޔާގެ ނައިބުގެ ރަސްމީގޭގެ ޚަރަދުތައް ކޮށްފައިވަނީ ދަޢުލަތުގެ މާލިއްޔަތު ޤާނޫނާ އެއްގޮތަށް ކަމަށް އޮޑިޓް ރިޕޯޓުގައި ބުނެފިއެވެ.

އޮޑިޓް އޮފީހުން މިއަދުވަނީ ރައީސުލްޖުމްހޫރިއްޔާގެ އޮފީހާއި ރައީސުލްޖުމްހޫރިއްޔާގެ ރަސްމީގެއާއި ރައީސުލްޖުމްހޫރިއްޔާގެ ނައިބުގެ ރަސްމީގޭގެ 2020 ވަނަ އަހަރުގެ އޮޑިޓް ރިޕޯޓް ނެރުއްވައިފައެވެ. ރައީސް އޮފީހުން ބުނެފައިވަނީ 2020 ވަނަ އަހަރުގެ ކޮންސޮލިޑޭޓެޑް މާލީ ބަޔާނަށް އޮޑިޓަރ ޖެނެރަލް ދެއްވާފައިވަނީ އަންކޮލިފައިޑް އޮޕީނިއަންއެއް ކަމަށެވެ.

"އޮޑިޓަރ ޖެނެރަލް ދެކެވަޑައިގަންނަވާ ގޮތުގައި މިއޮފީހާއި، ރައީސުލްޖުމްހޫރިއްޔާގެ ރަސްމީގެއާއި އަދި ރައީސުލްޖުމްހޫރިއްޔާގެ ނާއިބުގެ ރަސްމީގޭގެ 31 ޑިސެންބަރު 2020 އަށް ނިމުނު މާލީ އަހަރުގެ ޚަރަދުތައް ކޮށްފައިވަނީ، އެ އަހަރަށް ރައްޔިތުންގެ މަޖިލީހުން ފާސްކޮށްދެއްވި ބަޖެޓުގެ މަޤުޞަދުތައް ހާސިލުވާ ގޮތަށް، އެ ބަޖެޓުގައި ކަނޑައެޅިފައިވާ ކަންތައްތަކަށް، ބަޖެޓުގައި ކަނޑައެޅިފައިވާ މިންވަރަށް، ދައުލަތުގެ މާލިއްޔަތުގެ ޤާނޫނާއި ދައުލަތުގެ މާލިއްޔަތުގެ ގަވާއިދާ އެއްގޮތަށެވެ." ރައީސް އޮފީހުން ބުނެފައިވެއެވެ.

އޮޑިޓް ރިޕޯޓުގައިވާ ގޮތުން ރައީސުލްޖުމްހޫރިއްޔާގެ އޮފީހާއި، ރައީސުލްޖުމްހޫރިއްޔާގެ ރަސްމީގެއާއި އަދި ރައީސުލްޖުމްހޫރިއްޔާގެ ނާއިބުގެ ރަސްމީގޭގެ އެހެނިހެން މާލީ ކަންކަން، މައިގަނޑު ގޮތެއްގައި، ހިންގާ ބަލަހައްޓާފައިވަނީ، ދައުލަތުގެ މާލިއްޔަތުގެ ޤާނޫނާއި ދައުލަތުގެ މާލިއްޔަތުގެ ގަވާއިދާ އެއްގޮތަށެވެ.