ކަރަންޓު އިގުތިޞާދު ކުރުމަށް މިދުވަސްވަރު ހާއްސަ ސަމާލުކަމެއްދިނުމަށް ސްޓޭޓް އިލެކްޓްރިކް ކޮމްޕެނީ ސްޓެލްކޯއިން އިލްތިމާސްކޮށްފިއެވެ.

ސްޓެލްކޯއިން މިއަދު ބުނީ މިދުވަސްވަރަކީ ރާއްޖެއަށް އެންމެ ހޫނު ގަދަވާނެ ދުވަސްވަރު ކަމަށް މޫސުމާއި ބެހޭ އިދާރާއިން ލަފާކޮށްފައިވާކަމަށެވެ. އަދި މިދުވަސްވަރާއި ރޯދަމަސް ދިމާވެފައިވާތީ، ކަރަންޓު އިގުތިސާދު ކުރުމަށް ހާއްސަ ސަމާލުކަމެއްދިނުމަށް އެކުންފުނިން ވަނީ އިލްތިމާސްކޮށްފައެވެ.

"އެންމެ ގިނައިން ކަރަންޓު ބޭނުން ކުރާ ކަމަށް ބެލެވޭ، އޭސީ ފަދަ ވަސީލަތްތައް ބޭނުން ކުރުމުގައި އިތުރަށް ސަމާލުވުމަށް އިލްތިމާސް ކުރަން." ސްޓެލްކޯއިން ބުނެފައިވެއެވެ.

ސްޓެލްކޯއިން މީގެ ކުރިންވެސް ބުނެފައިވަނީ ކޮންމެ އަހަރެއްގެވެސް ފުރަތަމަ ދެތިންމަހު ހޫނު ގަދަވުމާއެކު ކަރަންޓު ބިލުތައް ބޮޑުކަމުގެ ޝަކުވާ ލިބޭކަމަށެވެ.

ސްޓެލްކޯގެ އަމާޒަކީ ކަރަންޓު ބިލު ބޮޑުވާ ސަބަބުތަކާމެދު ރައްޔިތުން ހޭލުންތެރިކުރުމަށް ކަމާބެހޭ މަޢުލޫމާތު ރައްޔިތުންނަށް ފޯރުކޮށްދިނުން ކަމަށާއި ކަރަންޓު ބޭނުންކުރުމުގައި އިޤްތިޞާދު ކުރުމަށް ސަމާލުކަން ދޭނަމަ ކަރަންޓުބިލު އަތްނުފޯރާފަށަށް ބޮޑުވެގެން ނުދާނެ ކަމަށް ސްޓެލްކޯއިން ވަނީ ބުނެފައެވެ.