ދައުލަތުގެ އޮފީސްތަކުން އަންނަ އަހަރު މުޅިން އަލަށް ހިންގުމަށް ނިންމާފައިވާ މަޝްރޫއުތަކުގެ މައުލޫމާތު ހުށަހަޅަން ދަޢުލަތުގެ މާލީ ވުޒާރާއިން އަންގައިފިއެވެ.

މާލީ ވަޒީރު އިބްރާހިމް އަމީރު ސޮއިކުރައްވައި ނެރެފައިވާ ސާކިއުލާގައިވާ ބުނެފައިވަނީ 2023 އިން 2025 ވަނަ އަހަރަށް ލަފާކުރާ މެދުރާސްތާގެ ބަޖެޓް އެކުލަވާލުމުގެ މަސައްކަތްތައް އެ މިނިސްޓްރީން ފަށާފައިވާކަމަށެވެ. އެހެންކަމުން އެބަޖެޓް އެކުލަވާލުމުގެ ފުރަތަމަ މަރުހަލާގައި ދައުލަތުގެ އޮފީސްތަކުން އަލަށް ފެށުމަށް ރާވާފައިވާ މަޝްރޫއުތައް އެކުލަވާލައި، ހުށަހެޅުން ހިމެނޭ ކަމަށް ސަރކިއުލާގައިވެއެވެ.

2023 އިން 2025 އަށް ލަފާކުރާ މެދުރާސްތާގެ ބަޖެޓަކީ ސަރުކާރުގެ ސްޓްރެޓީޖިކް އެކްޝަން ޕްލޭނާއި ނޭޝަނަލް ރެޒިލިއެންސް އެންޑް ރިކަވަރީ ޕްލޭންގެ މައްޗަށް ބިނާކޮށް ތައްޔާރުކުރާ ޕްރޮގްރާމް ބަޖެޓެކެވެ. އެހެންކަމުން ނިއު ޕޮލިސީ އިނިޝިއޭޓިވްސް އެކުލަވާލުމުގައި ދައުލަތުގެ އޮފީސްތަކުން ހުށަހަޅާ ކަންތައްތަކަކީ ސަރުކާރުން އެކުލަވާލާފައިވާ އެސްއޭޕީ އާއި އެންއާރްއާރްގައި ހިމެނޭ ކަންތައްތައް ހާސިލްވާނެގޮތަށް އެކުލަވާލާފައިވާ ކަންތައްތައްކަމުގައި ވާންވާނެ ކަމަށް މިނިސްޓްރީން ވަނީ ބުނެފައެވެ.

އޭގެ އިތުރުން އަލަށް އެކުލަވާލާ މަޝްރޫއުގެ ސަބަބުން މިންތީގެ ހަމަހަމަކަމަށް ކުރާނެ އަސަރާއި ސަސްޓެއިނަބަލް ޑިވެލޮޕްމަންޓް ގޯލްތަކާ ހުރި ގުޅުން ބަޔާންކުރަންވާނެ ކަމަށްވެސް ސަރކިއުލާގައިވެއެވެ.

މާލީ ވުޒާރާއިން ދަޢުލަތުގެ އޮފީސްތަކަށް އަންގާފައިވަނީ އަންނަ ޖޫން މަހުގެ 30 ވަނަ ދުވަހުގެ ކުރިން މަޝްރޫޢުތައް އެކުލަވާލާ އެ މިނިސްޓްރީއަށް ހުށައެޅުމަށެވެ.