ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަން ރައްޔިތުންގެ މަޖިލީހަށް މިއަދު ޙާޟިރުކުރެވުނީ ގޯސްކޮށް ކަމަށް ރައްޔިތުންގެ މަޖިލީހުގެ ރައީސް، މުޙައްމަދު ނަޝީދު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ވަޒީރުންނާއި ސުވާލުކުރުމުގެ ދަންފަޅީގައި މަރަދޫ ދާއިރާގެ މެންބަރު އިބްރާހީމް ޝަރީފު ނިޒާމީ ނުކުތާއެއް ނަންގަވައި ވިދާޅުވެފައިވަނީ މަޖިލީހުގެ ޤަވާއިދުގެ 80 ވަނަ މާއްދާގެ ދަށުން މެންބަރުން ކުރަށްވާ ސުވާލުގެ ޖަވާބު ދެއްވަން ޖެހެނީ ލިޔުމުން ކަމަށެވެ. އަދި ދިއްދޫ ދާއިރާގެ މެންބަރު ސުވާލު ކުރަށްވާފައިވަނީ 80 ވަނަ މާއްދާގެ ދަށުންކަމަށް މެންބަރު ޝަރީފް ފާހަގަކުރެއްވިއެވެ.

އެކަމާގުޅިގެން މަޖިލީހުގެ ރައީސް، ރައީސް ނަޝީދު ވަނީ މެންބަރު ޝަރީފްގެ ނިޒާމީ ނުކުތާ ގަބޫލުކުރަށްވައި ވަޒީރު މިއަދު މަޖިލީހަށް ޙާޟިރުކުރެވިފައިވަނީ ގޯސްކޮށްކަމަށް ވިދާޅުވެފައެވެ. އަދި ރައީސް ނަޝީދު ވަނީ ފިޝަރީޒް މިނިސްޓަރ ޑރ. ޙުސައިން ރަޝީދު ޙަސަންގެ އަރިހުން މައާފަށް ވެސް އެދިވަޑައިގެންފައެވެ.

"އަޅުގަނޑުމެންނަށް އިއްޒަތްތެރި ވަޒީރަށް ވަޑައިގަންނަވަން ދެންނެވުނީ ގޯހުން. އިއްޒަތްތެރި ވަޒީރަށް ލިޔުމުން ޖަވާބު ފޮނުވަން ދަންނަވަން ޖެހިފައި އޮންނާނީ. މިއަދު މިކަންތައްތައް ހިނގައިދިޔައީ މި ކަންކަން ހިނގާންވީ ގޮތަކަށެއް ނޫން،" ރައީސް ނަޝީދު ވިދާޅުވިއެވެ.

މި މޭރުމުން ވިދާޅުވުމަށްފަހު ރައީސް ނަޝީދުވަނީ ޑރ. ޙުސައިން ރަޝީދު ޙަސަނަށް އިތުރު ސުވާލުކުރުމަށް ހުޅުވާލި ފުރުސަތު ނިންމަވާލައްވާފައެވެ.