ރައީސް ޞާލިޙްގެ ރިޔާސީ ދައުރު ނިމުމުގެކުރިން 200 މަސްދޯނީގައި މޫދު ލޮނުން އައިސް އުފައްދާ 'ރެފްރިޖަރޭޓެޑް ސީވޯޓާ ސިސްޓަމް' ގާއިމުކުރުމުގެ މަސައްކަތް ކުރައްވަމުން ގެންދަވާ ކަމަށް މަސްވެރިކަމާބެހޭ ވަޒީރު ޑރ. ހުސެއިން ރަޝީދު ހަސަން ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކުރެންދޫ ދާއިރާގެ މެމްބަރު އަބްދުލްޣަނީ އަބްދުލްޙަކީމް ކުރެއްވި ސުވާލަށް ޖަވާބު ދެއްވަމުން މިނިސްޓަރ ޙުސައިން ވިދާޅުވީ އިސްލާމިކް ޑިވެލޮޕްމެންޓް ބޭންކާއި ސައުދީ ފަންޑުގެ އެހީގައި މަސްދޯނިތަކުގައި ރެފްރިޖަރޭޓެޑް ސީވޯޓާ ސިސްޓަމް ޤާއިމްކުރުމުގެ މަސައްކަތް ސަރުކާރުން ކުރަމުންގެންދާ ކަމަށެވެ. އަދި އެކަމަށް މީގެ ކުރިންވެސް އިޢުލާނު ކުރެއްވިކަމަށް މިނިސްޓަރ ވިދާޅުވިއެވެ. ނަމަވެސް އެފަހަރު ހުށައެޅި ބިޑްތައް ވަނީ ޑިސްކޮލިފައި ކޮށްފައެވެ.

މިނިސްޓަރ ވިދާޅުވީ ދޯނިތަކުގައި މި ނިޒާމު ގާއިމުކުރަން ބޭނުންވާ ފަރާތްތަކަށް އެސްއެމްއީ ބޭންކު މެދުވެރިކޮށް ލޯނު ލިބޭނެ ކަމަށެވެ. އަދި މި މަސައްކަތް ކުރާ ފަރާތްތަކަށް ފައިސާދޭނީ ސަރުކާރުން ކަމަށާއި، ލޯނު ދައްކާނީ އުޅަނދުގެ ވެރިފަރާތުން ކަމަށް މިނިސްޓަރ ވިދާޅުވިއެވެ.

ފިޝަރީޒް މިނިސްޓްރީން މިހާރުވަނީ އެ މަސައްކަތް ކޮށްދޭނެ ބަޔަކު އަލުން ހޯދުމުގެ މަސައްކަތް ފަށާފައެވެ.

ރާއްޖޭގެ އަތޮޅުތަކުގައި މިހާރު 17 އައިސްޕްލާންޓު އޮޕަރޭޓްކުރަމުންދާއިރު، އެއީ ޖުމްލަ ގާތްގަނޑަކަށް 730 ޓަނުގެ ކެޕޭސިޓީއެވެ. މަސްވެރިކަން ކުރިއެރުވުމަށް ސަރުކާރުން ކުރާ މަސައްކަތުގެ ދަށުން ރާއްޖޭގެ އެކި ހިސާބުތަކުން އައިސް ލިބޭނެ އިންތިޒާމް ހަމަޖައްސައިދިނުމުގެ މަސައްކަތް ދަނީ ކުރަމުންނެވެ. އަދި އެކި ހިސާބުތަކުން މަސް ކިރޭނެ އިންތިޒާމްވެސް ދަނީ ހަމަޖައްސަމުންނެވެ.