ދެކުނަށް މަސްވެރިކަން ރަނގަޅުވެ ބާނާ މަސްކޮޅު ނުކިރޭތީ ދެކުނުގެ މަސްވެރިން މުޒާހަރާކޮށް އަޑުއުފުލުމަށް ނިންމައިފިއެވެ.

ލ. އަތޮޅު ހިމެނޭހެން ދެކުނުގެ 5 އަތޮޅުގެ މަސްވެރިން ހިމެނޭ މި އެއްވުން އިންތިޒާމް ކުރުމަށް އިސްވެ ހަރަކާތްތެރިވާ ކެޔޮޅަކާ ހަވާލާދީ ބައެއް ނޫސްތަކުން ބުނެފައިވާ ގޮތުގައި، މަސްވެރިކަން ވަރަށް ބޮޑަށް ރަނގަޅުވެ ކޮންމެ ދޯންޏަކުން ދުވާލަކު ފަސް ޓަނު މަސް ކިރޭ ގޮތަށް މިފްކޯއިން މަސް ކިރާ އަދަދު ލިމިޓްކޮށްފައިވާ މައްސަލައިގައި ހިތްހަމަ ނުޖެހި އެ މައްސަލަ ހައްލު ކޮށްދިނުމަށް ގޮވާލާ ސަރުކާރަށް ބާރު އެޅުމަށް މަސްވެރިން މާދަމާ ކޫއްޑޫގައި އިހުތިޖާޖެއް ކުރަން ވަނީ ނިންމާފައެވެ.

އޭނާއާއި ހަވާލާދީ ބުނެފައިވަނީ، ބާނާ މަސްކޮޅު ނުކިރިގެން މަސްވެރިން އުޅެންޖެހޭ ހާލު ސަރުކާރަށް ނޭނގޭ ކަމަށާއި ކޮންމެ އަހަރަކު ވެސް މަސްވެރިކަން ރަގަޅު ދުވަސްވަރުގައި މިފްކޯގެ ކެޕޭސިޓީ ނެތް ކަމަށް ބުނެ މަސްގަތުން ކޮންޓްރޯލް ކުރުމުގެ ސަބަބުން، ބޮޑެތި އޮޑިފަހަރުން ކުރާ މަސްވެރިކަމުން ދެކޮޅު ނުޖެހޭ ކަމަށެވެ.

އަދި އަންނަ ހުކުރު ދުވަހު 5 އަތޮޅުގެ މަސްވެރިން ކޫއްޑޫއަށް ޖަމާވެ، ސަރުކާރަށާއި މިފްކޯއަށް އަޑު އިވެންދެން މުޒާހަރާ ކުރަން ނިންމާފައިވާ ކަމަށާއި މަސްވެރިކަން ރަގަޅުވެ މަސްނުކިރޭ ކޮންމެ ފަހަރަކު މިފްކޯ ތަރައްގީ ކުރަން ވަރަށް އަވަހަށް ފަށާނެކަމަށް ބުނާކަމަށާއި 2019 ވަނަ އަހަރުން ފެށިގެން އެ އަޑު އިވިއިވި މަސްވެރިން މިހާރު ފޫހިވެއްޖެކަމަށް އޭނާ ބުނެފައިވެއެވެ.

ކޫއްޑޫއަށް މާދަމާ މަސްކިރަން ކައިރި ކުރާ ފުރަތަމަ ދޯނިތަކުގައި ހުރި ހުރިހާ މަހެއް ނުކިރަނީސް އެ ދޯނިތަކުން މަސްކިރާ ޖެޓީތައް ކައިރިން ދުރަށް ނުގޮސް އެތާ ތިބޭނޭ ކަމަށް މަސްވެރިން ވަނީ ބުނެފައެވެ. އަދި މަސްވެރިންގެ ޑިމާންޑަކީ ކޫއްޑޫއަށް ފުރަތަމަ ފަހަރު މަސްކިރަން ކައިރި ކުރާއިރު 20 ޓަނާއި 40 ޓަނާއި ދެމެދުގެ އަދަދަކަށް މަސް ބާނާފައި ހުންނަ ދޯންޏަކުން ބާނާފައި ހުންނަ ހުރިހާ މަހެއް ކިރުވުން ކަމަށާއި އެ ޑިމާންޑަށް ބޯ ނުލަބާ ނަމަ އެއްވެސް ދޯންޏަކުން މާދަމާ ކޫއްޑޫއަށް މަސް ނުކިރަން ނިންމާފައިވާ ކަމަށް މިކަން އިންތިޒާމުކުރާ ފަރާތުންވަނީ ބުނެފައެވެ. މާދަމާގެ އިހުތިޖާޖުގައި މަދުވެގެން 40 ދޯނި ބައިވެރިވާނެ ކަމަށް އެ ފަރާތުން ބުނެއެވެ.

މަސްވެރިންނަށް ދިމާވެފައިވާ މައްސަލަތައް ހައްލު ކުރުމަށް ގޮވާލާ މިހަފްތާގައި މަޖިލީހަށް މައްސަލައެއް ވެއްދިއެވެ. ނަމަވެސް އެ މައްސަލަ ވަނީ މަޖިލީހުން ބޭރުކޮށްލާފައެވެ.