މަސްކިރުން ލިމިޓްކޮށްފައިވާތީ މަސްވެރިން އިޙްތިޖާޖުކުރަން ފަށައިފިއެވެ.

މަޢުލޫމާތު ލިބިފައިވާ ގޮތުގައި ދެކުނުގެ އަތޮޅުތަކުގެ މަސްވެރިން މިއަދު ގެންދަނީ ކޫއްޑޫގައި މުޒާހަރާކުރަމުންނެވެ. ކޫއްޑޫގައި ތިބި މަސްވެރިންގެ ޑިމާންޑަކީ އެ މީހުން ބާނާފައިވާ މަސް އެއްކޮށް، އެއްފަހަރާ ކިރޭނެ އިންތިޒާމެއް ހަމަޖެއްސުމެވެ. އަދި މަސް ނުކިރުވާނަމަ އެސަރަޙައްދަށް މިހާރު ކައިރިކޮށްފައިވާ އޮޑިފަހަރު ދުރަށް ނުޖައްސާނެކަމަށް މަސްވެރިން ދަނީ ބުނަމުންނެވެ.

މިދިޔަ ހަފްތާގައި މަސްވެރިކަން ރަގަޅުވެ ކޫއްޑޫގެ ކެޕޭސިޓީއަށްވުރެ ގިނައިން މަސްބާނަމުން ދިއުމާއި ގުޅިގެން މިފްކޯއިންވަނީ މަސްކިރުން ކޮންމެ ދޯންޏަކަށް ދުވާލަކު 5 ޓަނަށް ލިމިޓް ކޮށްފައެވެ.

މިފްކޯއިން މަސްކިރުން ލިމިޓްކޮށްފައިވަނީ އެއްފަހަރާ އެއްދޯންޏަކުން ގިނަ ޢަދަދަކަށް މަސްކިރައިފިނަމަ ކޫއްޑޫއަށް މަސްކިރުވަން އަންނަ ހުރިހާ ދޯންޏަކަށް މަސްކިރުމުގެ ފުރުސަތު ނުލިބޭނެތީކަމަށް މިފްކޯއިންވަނީ ބުނެފައެވެ.

ރާއްޖޭގެ އަތޮޅުތަކުގައި މިހާރު 17 އައިސްޕްލާންޓު އޮޕަރޭޓްކުރަމުންދާއިރު، އެއީ ޖުމްލަ ގާތްގަނޑަކަށް 730 ޓަނުގެ ކެޕޭސިޓީއެވެ. މަސްވެރިކަން ކުރިއެރުވުމަށް ސަރުކާރުން ކުރާ މަސައްކަތުގެ ދަށުން ރާއްޖޭގެ އެކި ހިސާބުތަކުން އައިސް ލިބޭނެ އިންތިޒާމް ހަމަޖައްސައިދިނުމުގެ މަސައްކަތް ދަނީ ކުރަމުންނެވެ. އަދި އެކި ހިސާބުތަކުން މަސް ކިރޭނެ އިންތިޒާމްވެސް ދަނީ ހަމަޖައްސަމުންނެވެ.