މަސްވެރިން ބާނާ މަހަށް ހަދާނެ ގޮތެއް ސަރުކާރަށް ނުވިސްނިގެން ނޫޅޭކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ އިގްތިސާދީ ކޮމިޓީން ރޭ ގދ. ތިނަދޫގެ މަސްވެރިންނާއެކު ބޭއްވި ބައްދަލުވުމެއްގައި ބައިވެރިއަކު ދެއްކި ވާހަކަތަކެއް ހިއްސާކުރައްވަމުން ރައީސް ނަޝީދު ވިދާޅުވީ މަސްވެރިން ބާނާ މަހަށް ހަދަންވީ ގޮތް ސަރުކާރަށް ނުވިސްނިގެން ނޫޅޭ ކަމަށާއި އެ ގޮތް ނުހަދަނީ ކަމަށެވެ.

ރޭގެ ބައްދަލުވުމުގައި މަސްވެރިންވަނީ އެމީހުންގެ ކަންބޮޑުވުންތައް ޙިއްސާކޮށް އެކަންކަމަށް ޙައްލު ހޯދައިދިނުމުގައި ސަރުކާރުގެ ސްޕީޑް ލަސްވެފައިވާ ކަމަށް ބުނެފައެވެ. އަދި މަސްވެރިންގެ އަމިއްލަ މަސައްކަތުން މަހުގެ ހަމައަގު ހޯދުމަށް މަސައްކަތް ކުރަންޖެހިދާނެ ކަމަށް މަސްވެރިން ބުނެފައިވެއެވެ.

"އަޅުގަނޑުމެން ހުވަދު އަތޮޅުގެ މަސްވެރިންގެ ހިތްވަރު އެބަހުރި. އަޅުގަނޑުމެން އަމިއްލައަށް މަސް ކިރާ ފެކްޓްރީއެއްވެސް ގެނެވިދާނެ. މި ހުވަދު އަތޮޅުގެ ހުރިހާ ދޯނިތަކެއް ކިރާލާފިއްޔާ 400، 500 ޓަނު އަޅުގަނޑުމެންނަށް ނުލިބޭނެ ގޮތެއް ނޯންނާނެ." އެބައްދަލުވުމުގައި ޝުޢޫރު ފާޅުކުރި މީހަކު ބުނެފައިވެއެވެ.

Masverin baanaa mahah hadhaane goiy nuvisnigen noolhey. E goiy nuhadhanee pic.twitter.com/EUE0cuzHBr

— Mohamed Nasheed (@MohamedNasheed) April 22, 2022

ދާދިފަހުން ރައީސް ނަޝީދު ވިދާޅުވީ އެމްޑީޕީގެ 2013 ވަނަ އަހަރުގެ މެނިފެސްޓޯއަށްވުރެވެސް ބޮޑަށް 2018 ވަނަ އަހަރުގެ މެނިފެސްޓޯ ބިނާކޮށްފައިވަނީ ކަނޑު ރޯދި ހޯދުމުގެ ހުށަހެޅުމެއްގެ ގޮތުގައި ކަމަށާއި، ނޫ އިޤުތިޞާދެއް ބިނާކުރުމުގެ މައްޗަށް ކަމަށެވެ. އަދި އެ ސިޔާސަތުގެ ނާރެހަކީ މަސްވެރިކަމުގެ ފުރިހަމަ ނަފާ ހޯދުން ކަމަށް ރައީސް ނަޝީދު ވަނީ ފާހަަގަކުރައްވާފައެވެ.

އޭގެއިތުރުން ރައީސް ނަޝީދު ވަނީ އެމްޑީޕީގެ މެނިފެސްޓޯގެ މަގަށް ރުޖޫއަވުމަށް ސަރުކާރަށް ގޮވާލައްވާފައެވެ.