އެމްޑީޕީގެ ޗެއަރޕާސަންގެ މަގާމަށް ކުރިމަތިލައްވާފައިވާ އިމްތިޔާޒު ފަހުމީ (އިންތި) ގެ އެދިވަޑަގަތުމުގެ މަތިން އެކި ފަރާތްތަކަށް މި ސަރުކާރުން ވަޒީފާ ދިނުމާއި ގުޅޭގޮތުން އޭނާ ދެއްކެވި ވާހަކަ ދިމާނުވުމުން، ގިނަބަޔަކު އޭނާއަށް ފާޑުކިޔައިފިއެވެ.

ޗެއަރޕާސަންގެ އިންތިހާބުގެ ކެމްޕޭންގައި އިންތިވަނީ އިއްޔެ އިނގުރައިދޫއަށް ޒިޔާރަތް ކުރައްވަައި އެރަށުގައި ބައްދަލުވުމެއް ބާއްވަވާފައެވެ. އެ ރަށުގައި ތިބި އެމްޑީޕީގެ ބައެއް މެންބަރުންނާ ވާހަކަ ދައްކަވަމުން އިންތި ވަނީ، އެއްވެސް މީހަކަށް މި ސަރުކާރުން ވަޒީފާ ހޯދަން އޭނާ އެދިވަޑައިގެންފައި ނުވާނެކަމަށެވެ.

"އަޅުގަނޑަކީ ހަމަހިލާ ރިސޯޓެއް ހޯދި މީހެއް ނޫން. ފަޅުރަށެއް ހޯދި މީހެއް ނޫން. ޕްރޮޖެކްޓެއް ހޯދި މީހެއްނޫން. ބިޑެއް ކާމިޔާބުކުރަން ދުވަހަކު މީހަކަށްގުޅާ މީހެއް ނޫން. ވަޒީފާއެއް އާއިލާގެ މީހަކަށް ހޯދުމަށްޓަކައި ގުޅިމީހެއް ނޫން" އިނގުރައިދޫގައި ވާހަކަ ދައްކަވަމުން އިންތި ވިދާޅުވިއެވެ.

މިވާހަކަތަކުގެ ތެރެއިން ގިނަބަޔަކު އެންމެ އަޅައިގަތް ވާހަކައަކީ، މީހަކަށް ވަޒީފާއެއް ހޯދައިދޭންއެދި އެއްވެސް މީހަކަށް ގުޅުއްވާފައި ނުވާނެކަމަށް ވިދާޅުވެ އިންތި ދެއްކެވި ވާހަކައެވެ. އެހެން ނަމަވެސް ރައްޔިތުންގެ މަޖިލީހުގެ ޖަލްސާއެއްގައި ވާހަކަ ދައްކަވަމުން މީހަކަށް ސިޔާސީ ވަޒީފާއެއް ހޯދައިދޭން އިންތި އުޅުއްވަައިގެން އެކަން ނުވެގެން އުޅޭ ވާހަކަ މަޖިލީހުގެ ތަޅުމުގައި ދައްކަވާއިވާކަން ގިނަބަޔަކު ވަނި ފާހަގަކޮށްފައެވެ. އަދި އިންތިގެ އެ ވީޑިއޯ ކްލިޕް މީސްމީޑިއާގައި މިއަދު އަންނަނީ ވަރަށް ބާރަށް ދައުރުވަމުންނެވެ.

Sarukaaraai leden hadhaigen gos athah mi govanee dhon Kalo.
Mi gothah olhuvaalaigen dhogu hadhaa meehaku MDP ge CP kamah gennan heyo nuvaane noon tho.???#MDPhingaalan pic.twitter.com/iDs70BEqku

— Boy (@iamMujey) April 23, 2022

"އަޅުގަނޑުގެ ރިކުއެސްޓަކަށް ސިޔާސީ މަގާމެއް މީހަކަށް ދޭން ހުށަހެޅީމަ، މާފަހުން ފުރަތަމަ ދައުރަށް ހޮވިވަޑައިގެންނެވި ބޭފުޅުން އަޅުގަނޑުގެ މައްޗަށް އިސްކޮށްފައި އެބަ ވަޒީފާދޭ. ހިނގާފައި އެބަހުރި މިކަން." އެދުވަހުގެ ޖަލްސާގައި އިންތި ވިދާޅުވިއެވެ.

އިންތިގެ މިވާހަކައާއި ގުޅިގެން، އެމްޑީޕީގައި އުފެދިފައިވާ ފެކްޝަންތަކުގެ ތެރެއިން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ތާއީދު ކުރާ ފަރާތްތަކުގެ ފެކްޝަންގެ އެކި މީހުން ބުނަމުންދަނީ، މި ވާހަކަތަކުން ސާފުވަނީ އިންތި ދައްކާ ވާހަކައިގައި ވެސް އިހުލާސްތެރިކަމާއި ތެދުވެރިކަމެއް ނެތްކަން ކަމަށެވެ. އެއްދުވަހު ވަޒީފާއެއް ދޭން ހުށަހެޅީމަ އެކަން ބަލައިނުގަތް ވާހަކަ ވިދާޅުވަމުން، އަނެއް ދުވަހު ވަކި މީހަކަށް ވަޒީފާއެއް ދޭން އެދިވަޑައިގެންފައި ނުވާނޭކަމަށް ވިދާޅުވުމަކީ ބޮޑު އޮޅުވާލުމެއް ކަމަށް އެ ފަރާތްތަކުން އަންނަނީ ބުނަމުންނެވެ.

މިކަމާއި ގުޅިގެން އިންތިއަށް ފާޑުކީ މީހަކު މީސްމީޑިއާގައި ބުނީ، އެއީ ސަރުކާރާއި ޖެހިގަނެގެން އުޅެން ހަދައިގެން ލިބުނު "ލަނޑެއް" ކަމަށެވެ. އަދި އިހުލާސްތެރިކަން ދެއްކުމަށް ދެފަހަރު ދެގޮތަށް ވާހަކަ ދައްކާ މީހަކު އެމްޑީޕީފަދަ ޕާޓީއެއްގެ ޗެއަރޕާސަނަކަށް އެންމެ އެކަށީގެން ނުވާކަމަށް ވެސް އޭނާ ބުނެފައިވެއެވެ.