ރާއްޖޭގެ ރަސްމީ ބަހެއްގެ ގޮތުގައި އިނގިރޭސި ބަސް ހަމަޖެއްސުމާމެދު ފާޅުކުރެއްވީ އަމިއްލަ ޚިޔާލެއް ކަމަށާއި އެއީ ސަރުކާރުގެ ބަހެއްނޫން ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ޙަސަން ވިދާޅުވެއްޖެއެވެ.

ދިވެހި ބަހަށް ކުރާ އިޙްތިރާމަށް ނިކަމެތިކަމެއް ނާންނަ ގޮތައް ރާއްޖޭގެ ރަސްމީ ބަހެއްގެ ގޮތުގައި އިނގިރޭސި ބަސް ހަމަޖައްސައިފިނަމަ ޤައުމުގެ ތަރައްޤީ ހަލުވިވެ، ރައްޔިތުންނަށް ލިބޭ ފައިދާ ބޮޑުވާނެ ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ހަސަން އިއްޔެ ވަނީ ވިދާޅުވެފައެވެ. މެންބަރު އިކްރާމް ވިދާޅުވީ، ރާއްޖޭގެ އިގްތިސާދު ހިނގަނީ ވަރަށް ބޮޑަށް އިނގިރޭސި ބަހަށް ބަރޯސާ ވެގެން ކަމަށެވެ.

އިކްރާމްގެ ވާހަކައާއި ގުޅިގެން މީސް މީޑިއާގައި ގިނަބަޔަކު އެކަމާ ބަޙުސްކުރަން ފަށާފައިވާއިރު، އިކްރާމް މިއަދު ވިދާޅުވީ މީސްމީޑިއާގައި އޭނާ ފާޅުކުރާ ޚިޔާލުތަކަކީ އަމިއްލަ ވިސްނުން ކަމަށާއި އެއީ ސަރުކާރާއި އެމްޑީޕީގެ ނިންމުންތައް ނޫން ކަމަށެވެ.

"އަޅުގަނޑު ޓްވީޓްކުރާ އަމިއްލަ ޚިޔާލަކީ އާންމުންގެތެރޭ ވާހަކަދައްކާލާ ބަހުސް ކޮށްލަން ދޫކޮށްލެވޭ ޚިޔާލް. އެއީ އެމްޑީޕީގެ ނުވަތަ ސަރުކާރުގެ ނިންމުމެއް ނޫން." އިކްރާމް ވިދާޅުވެފައިވެއެވެ.

ކޮންމެ އަހަރެއްގެ ވެސް އޭޕްރިލް މަހުގެ 23 ވަނަ ދުވަހު ފާހަގަކުރާ ބައިނަލްއަޤުވާމީ އިނގިރޭސި ބަހުގެ ދުވަހާއި ގުޅުވައިގެން އދ.ގެ ޢާންމު މަޖިލީހުގެ 76 ވަނަ ސެޝަނުގެ ރައީސް، ރާއްޖޭގެ ޚާރިޖީ ވަޒީރު ޢަބްދުﷲ ޝާހިދު ހިއްސާ ކުރެއްވި ވީޑިއޯގައި އެމަނިކުފާނު ވަނީ ބަވަނަ ވަމުންދާ ދުނިޔޭގައި ވޯލްޑް ލެންގުއޭޖްގެ ގޮތުގައި މީހުން ދެކެމުން އަންނަ އިނގިރޭސި ބަހުގެ މުހިއްމުކަމަށް އަލިއަޅުވާލައްވައި ވާހަކަފުޅު ދައްކަވާފައެވެ. އިކްރާމް އެޚިޔާލު ފާޅުކުރަށްވާފައިވަނީ ޝާހިދުގެ ވާހަކަކޮޅު ޙިއްސާ ކުރަށްވަމުންނެވެ.

"ރާއްޖޭގަ ދިވެހި ބަހަށް ކުރާ އިހްތިރާމަށް ނިކަމެތިކަމެއް ނާންނަ ގޮތަށް އިނގިރޭސި ބަސް ރަސްމީ ބަހަކަށް ހަދައިފި ނަމަ ރާއްޖެ ތަރައްގީވެގެން އަންނަ ސްޕީޑް މާ ބޮޑަށް ހަލުއިވެ، ރައްޔިތުންނަށް ކުރާ ފައިދާ ބޮޑުވާނެ. ރާއްޖޭގެ އިގްތިސާދު ހިނގަނީ ވަރަށް ބޮޑަށް އިނގިރޭސި ބަހަށް ބަރޯސާ ވެގެން." އިކްރާމް ޢާންމުންނަށް ބަހުސްކުރުމަށް ދޫކޮށްލެއްވި ޚިޔާލުގައިވެއެވެ.