އިންޑިއާ އައުޓް ޙަރަކާތް ހުއްޓުވުމަށް ރައީސް އިބްރާހިމް މުޙައްމަދު ޞާލިޙް ނެރުއްވި ގަރާރުގެ ސަބަބުން ޚިޔާލު ފާޅުކުރުމުގެ މިނިވަންކަން ހަނިވާކަމަށް ބުނެ ރައްޔިތުންގެ މަޖިލީހަށް ހުށައެޅި ކުއްލި މައްސަލަ ބޭރު ކޮށްލައިފިއެވެ.

މަޑުއްވަރީ ދާއިރާގެ މެމްބަރު އާދަމް ޝަރީފް ހުށައެޅުއްވި ކުއްލި މައްސަލައިގައި ބުނެފައިވަނީ އިސްލާމް ދީނާއި ޚިލާފުނުވާ ކޮންމެކަމެއް ކުރުމުގެ މިނިވަންކަން ޤާނޫނު އަސާސީން ކޮންމެ ރައްޔިތަކަށް ލިބިގެންވާ ކަމަށެވެ. އެހެންކަމުން ޤާނޫނަކުން ހުއްދަ ލިބިގެން މެނުވީ އެއްވެސް މީހަކު ކުރާކަމެއް ހުއްޓުވައި ހުރަސް އަޅައިގެން ނުވާނެ ކަމަށާއި ނަމަވެސް ޤާނޫނު އަސާސީގެ 115 ވަނަ މާއްދާގެ ދަށުން ރައީސް ނެރުވި ގަރާރުން ޚިޔާލުފާޅުކުރުމުގެ މިނިވަންކަން ހަނިވެގެންދާ ކަމަށް އާދަމް ޝަރީފްގެ ކުއްލި މައްސަލާގައިވެއެވެ.

ކުއްލި ނުރައްކަލުގެ ހާލަތުގައިވެސް ޚިޔާލު ފާޅުކުރުމުގެ މިނިވަންކަން ހަނި ނުކުރެވޭނެކަމަށާއި، އެހެންކަމުން ޤާނޫނު އަސާސީން ކަށަވަރުކޮށްދޭ ޙައްޤުތައް ހަނިކުރުމަށް ޤަރާރެއް ނެރުނަސް އެވާނީ ބާތިލު އެއްޗަކަށް ކަމަށް އާދަމް ޝަރީފް މިއަދު ވިދާޅުވިއެވެ. ކުއްލި މައްސަލާގައި ސަރުކާރަށް ގޮވާލާފައިވަނީ ފުލުހުންނާއި ސިފައިން ބޭނުންކޮށްގެން ޚިޔާލު ފާޅުކުރުމުގެ މިނިވަންކަން ހަނިކުރުމަށް ކުރާ މަސައްކަތް ހުއްޓާލުމަށެވެ.

މިމައްސަލައާމެދު މަޖިލީހުގައި ނެގި ވޯޓުގައި ބަހުސް ކުރުމަށް ފެންނަ ކަމަށް ވޯޓު ދެއްވީ 5 މެމްބަރުންނެވެ. އަދި ނުފެންނަ ކަމަށް 27 މެމްބަރުން ވޯޓު ދެއްވައި މަޖިލީހުން މި މައްސަލަ ވަނީ ބޭރުކޮށްލާފައެވެ.

ރައީސުލްޖުމްހޫރިއްޔާ ނެރުއްވި ޤަރާރުގައި އިންޑިއާއާއި ދެކޮޅަށް ހިންގާ ހަރަކާތްތަކަކީ ޤާނޫނު އަސާސީން ލިބިދީފައިވާ ޚިޔާލު ފާޅު ކުރުމުގެ މިނިވަންކަމާއި އެއްވެއުޅުމުގެ މިނިވަންކަމުގެ ނާޖާއިޒު ފައިދާ ނަގައި، ރާއްޖޭގެ ޞުލްޙަ މަސަލަސްކަން ނަގައިލުމުގެ ނިޔަތުގައި ހިންގާ ހަރަކާތެއްކަން ފާހަގަކުރައްވާފައިވެއެވެ.

އަދި އެއީ ދިވެހިރާއްޖެއާ އިންޑިޔާއާއެކު އޮތް ޒަމާންވީ ބަދަހި ގުޅުމަށާއި، ރާއްޖޭގެ ތަރައްޤީއަށާއި މި ސަރަޙައްދުގެ ސަލާމަތާއި ހަމަޖެހުމާއި އަމަންއަމާންކަން ދެމެހެއްޓުމަށް ބައިނަލްއަޤްވާމީ ފެންވަރުގައި ކުރަމުންދާ މުހިންމު މަސައްކަތްތަކަށް ހުރަސްއެޅުމަށް ރާވައިގެން ހިންގާ ހަރަކާތެއްކަންވެސް ރައީސްގެ ޤަރާރުގައި ވިދާޅުވެފައިވެއެވެ.