ޖުމްހޫރީ މައިދާން ސަރަހައްދުގައި އަލުން ވިނަ އިންދައި، އެ ސަރަހައްދު ފެހިކޮށްލައިފިއެވެ.

މާލެ ސިޓީ ކައުންސިލުން ޖުމުހޫރީ މައިދާނުގައި ވިނަ އިންދުމުގެ މަސައްކަތް ފެށީ މިދިޔަ އަހަރުގެ ނޮވެމްބަރު 15 ވަނަ ދުވަހުއެވެ. އެ މަސައްކަތް 15 ދުވަހުގެ ތެރޭގައި ނިންމަން އޭރު ސިޓީ ކައުންސިލުން އޮތީ އަމާޒު ހިފާފައެވެ. ނަމަވެސް ސަރުކާރުގެ އެކި އިވެންޓުތަކަށް ޖުމުހޫރީ މައިދާން ބޭނުން ކުރަން ޖެހުމުގެ ސަބަބުން ވިނަތަކަށް ބޮޑެތި ގެއްލުންތައް ލިބުމުގެ ސަބަބުން މަސައްކަތް ނިންމުމަށް އިތުރު އެއް މަސްދުވަސް ނެގީ ކަމަށް ސިޓީ ކައުންސިލުންވަނީ ބުނެފައެވެ.

މާލޭގެ ޖުމްހޫރީ މައިދާން ސަރަހައްދުގައި އަލުން ވިނަ އިންދައި ފެހިކޮށްލާފައިވާކަން ހާމަކުރައްވާފައި ވަނީ، މާލެ ސިޓީގެ މޭޔަރު ޑރ. މުޙައްމަދު މުއިއްޒު މިއަދު ކުރެއްވި ޓުވީޓެއްގައެވެ. އެ ސަރަހައްދު ފެހިކޮށްލާފައިވާ ހިތްގައިމު މަންޒަރު ފެންނަ ބައެއް ފޮޓޯތައް ވެސް މުއިއްޒުވަނީ އާންމުކުރައްވާފައެވެ.

Jumhooree maidhaan aabaathurafiluvumge masakkathuge therein vina indhaa fehikoh nimifai. pic.twitter.com/PIi3lUF1Ul

— Dr Mohamed Muizzu (@MMuizzu) April 30, 2022

ޖުމުހޫރީ މައިދާނުގައި ކުރިން ހުރި ވިނަތައް ނަގައި ބަދަލުކުރީ އޮސްޓްރޭލިއާ ވިނައަށެވެ. އެތަން އަލުން ރީތިކުރުމުން މާލޭގެ ކުރީގެ ޑެޕިއުޓީ މޭޔަރު ޝަމާއު ޝަރީފާއި ގިނަ ބަޔަކު ވަނީ މޭޔަރުގެ މަސައްކަތަށް ތައުރީފުކޮށް، ޝުކުރު އަދާކޮށްފައެވެ.

ޖުމްހޫރީ މައިދާން ރީތި ކުރުމަށް ސިޓީ ކައުންސިލުން ކުރިޔަށްގެންދިޔަ މި މަޝްރޫއުގެ ތެރެއިން ކުރިޔަށް ގެންދިޔަ އިތުރު މަސައްކަތްތަކުގެ ތެރޭގައި، ޖުމްހޫރީ މައިދާނުގެ ރުއްގަސްތައް ވަށައިގެން ހަދާފައިވާ އަށިތަކުގެ މުށި ބަދަލު ކުރުމާއި، ބުރުތަކުގެ ގަސްތައް ސާފުކޮށް، ބުރުތަކުގެ ކުލަ ބަދަލުކުރުމާއި، ހުރިހާ ރުއްތަކެއް ސާފުކުރުމާއި އަދި ހެލިޕެޑް ލޭންޑިން ސަރަހައްދުގައި ކުލަ އާކުރުން ހިމެނެއެވެ.

ޖުމްހޫރީ މައިދާނަކީ ނޮވެމްބަރު ތިނެއްގެ އުދުވާނީ ހަމަލާޔަށް ފަހު، 1989 ވަނަ އަހަރު ހުޅުވި، ގައުމީ ވަންތަކަމާއި ދިވެހި އަބްތާލުންގެ ގުރުބާނީ ރަމްޒުކޮށްދޭ މައިދާނެކެވެ.