ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް މިއަދު ޤައުމާއި މުހާތަބު ކުރައްވާނެކަމަށް ރައީސް އޮފީހުން ބުނެފިއެވެ.

ރައީސް އޮފީހުން ބުނީ ރައީސް ޞާލިޙް ގައުމާއި މުހާތަބު ކުރެއްވުމަށް ހަމަޖެހިފައި ވަނީ މިއަދު މެންދުރުފަހު 13:15ގައި ކަމަށެވެ. ރައީސް ޤައުމާއި މުހާތަބު ކުރައްވާ ސަބަބެއް ރައީސް އޮފީހުން ހާމައެއް ނުކުރެއެވެ.

ރައީސުލްޖުމްހޫރިއްޔާ މިއަދު ޤައުމާ މުޚާތަބު ކުރަށްވާއިރު މިއަހަރަށް އިއްވެވި ރިޔާސީ ބަޔާނުގައި އެމަނިކުފާނު ވަޢުދުވެވަޑައިގެންނެވި ތަޢުލީމީ ދާއިރާގައި މަސައްކަތްކުރަށްވާ ހުރިހާ މުވައްޒަފުންގެ މުސާރަތައް މިހިނގާ މެއި މަހުން ފެށިގެން ބޮޑުކުރަށްވަން ނިންމާފައިވާ ނިންމެވުމާއި ގުޅިގެން މުސާރަތަކަށް އަންނަ ބަދަލުގެ ތަފުސީލުތައް މިއަދު ހާމަކުރަށްވާނެކަން ވަނީ އިޢުލާން ކޮށްފައެވެ.

މިއަހަރުގެ ރިޔާސީ ބަޔާނުގައި ރައީސް ޞާލިޙު ވަނީ މުސާރަތައް ބޮޑުކުރުމުން ޓީޗަރުންނާއި ޕްރިންސިޕަލުން ފަދަ ތަޢުލީމީ ދާއިރާގެ ބައެއް މަގާމުތަކުގެ މުސާރަތައް ބޮޑުވެގެންދާނެ ގޮތުގެ ތަސައްވަރެއް ހާމަކޮށްދެއްވާފައެވެ.

"މިބަދަލާއެކު، ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ، އިތުރުގަޑި ނުލާ 12,628 ރުފިޔާ އިން 19,740 ރުފިޔާއަށް ބޮޑުވެގެންދާނެ. މިއީ 56 ޕަރސެންޓްގެ ކުރިއެރުމެއް." ރައީސް ޞާލިޙު ރިޔާސީ ބަޔާނުގައި ވިދާޅުވިއެވެ.

ޓީޗަރުންގެ މުސާރަ މިހިނގާ މޭމަހުން ފެށިގެން ބޮޑުކުރުމަށް ނިންމާފައިވާއިރު، ޓީޗަރުންގެ މުސާރައަށްފަހު ސިއްހީ ދާއިރާގެ މުވައްޒަފުންގެ މުސާރަ ބޮޑުކޮށްދެއްވާނެކަމަށް ވެސް ރައީސުލްޖުމްހުރިއްޔާ ވަނީ ވިދާޅުވެފައެވެ.