ކުރިޔަށް އޮތް 2023 ވަނަ އަހަރު އޮންނަ ރިޔާސީ އިންތިހާބު އެމްޑީޕީން ކާމިޔާބު ކުރަން ބޭނުންނަމަ، ޕާޓީގެ ޗެއަރޕާސަންގެ މަގާމަށް ފައްޔާޒު އިސްމާޢީލް ހޮވަންޖެހޭކަމަށް ކުޅުދުއްފުށީ ސިޓީގެ މޭޔަރު މުޙައްމަދު އާތިފު ވިދާޅުވެއްޖެއެވެ.

ޗެއަރޕާސަންގެ މަގާމަށް ވާދަކުރައްވާ މި ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާޢީލަށް ތާއީދު ކުރައްވާކަން ހާމަ ކުރައްވާ ދެއްވި އިންޓަވިއުއެއްގައި އާތިފު ވިދާޅުވީ، އެމްޑީޕީއަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީ ކަމަށާއި އަދި އެއީ އެންމެ ގިނަ ރައްޔިތުން ހިމެނޭ ޕާޓީ ކަމަށެވެ. އެހެންކަމުން އެ ޕާޓީގެ ޗެއަރޕާސަންގެ އިންތިހާބަކީ މުޅި ގައުމުގެ ތަރައްގީއާއި އަދި މުޅި ގައުމާއި ރައްޔިތުންނާއިވެސް ގުޅުންހުރި އިންތިހާބެއްކަމަށް އޭނާ ވިދާޅުވިއެވެ.

އޭނާ ވިދާޅުވީ، ދިވެހިރާއްޖެ ތަރައްގީ ކުރުމުގެ ނިޒާމަކަށް ލާމަރުކަޒީ ނިޒާމު ހިޔާރުކޮށް އެ ނިޒާމުގެ ތެރެއިން ރާއްޖެ ތަރައްގީކުރާ ހަމައެކަނި ޕާޓީއަކީ އެމްޑީޕީ ކަމަށެވެ. އެ ނިޒާމު ރާއްޖޭގައި ފައްކާކުރުމުގެ މަސައްކަތް އެމްޑީޕީގެ ފުރަތަމަ ވެރިކަމުގައި ފެށިނަމަވެސް، ވެރިކަން ނިމުމަކަށް އައުމުން އެކަން ހާސިލުނުވެ ހަތް އަހަރު ވޭތުވެގެން ހިގައްޖެކަމަށް ވެސް އާތިފު ވިދާޅުވިއެވެ.

ހަތް އަހަރަށްފަހު އުފެދުނު އެމްޑީޕީގެ މިވެރިކަމުގައި ރައީސް އިބްރާހީމް މުޙައްމަދު ޞާލިހްގެ ސަރުކާރުން ލާމަރުކަޒީ ނިޒާމު ފުޅާކުރުމަށް މިހާރުވަނީ އާ މަސައްކަތްތަކެއް ފެށިފައި ކަމަށާއި އެހެންކަމުން، ވެރިކަމުގައި ގިނަ ދުވަހު އެމްޑީޕީ އޮތުމަކީ މުހިންމު ކަމެއްގެ ގޮތުގައި ގަބޫލު ކުރައްވާކަމަށް ވެސް އާތިފު ވިދާޅުވިއެވެ.

އޭނާ ވިދާޅުވީ، އެމްޑީޕީ ވެރިކަމުގައި އޮތުމަށްޓަކައި އެޕާޓީއާއި ޕާޓީގެ އާންމު މެންބަރުންނާއި ސަރުކާރާއި އޮތް ގުޅުން މިހާރަށްވުރެ ހަރުދަނާ ވާންޖެހޭ ކަމަށާއި، ސަރުކާރާއި ޕާޓީގެ މެންބަރުންނާއި އޮތް ގުޅުން ރަނގަޅުކޮށް ސަރުކާރު ވަރުގަދަކޮށް 2023 ވަނަ އަހަރުގެ އިންތިހާބު ކާމިޔާބު ކުރުމަށް، މިހާރު ހޮވަން މިއުޅޭ ޗެއަރޕާސަން ކުރަންޖެހޭ މަސައްކަތަކީ ބުރަ މަސައްކަތެއް ކަމަށެވެ.

"ކުރިޔަށް އޮތް 2023 ވަނަ އަހަރުގެ ރިޔާސީ އިންތިހާބު އެމްޑީޕީން ކާމިޔާބު ކުރުމަށްޓަކައި އެމްޑީޕީގެ ޗެއަރޕާސަނނަކަށް ފައްޔާޒު އިސްމާޢީލް، އާދެ މިހާރު ވެސް ސަރުކާރުގައި މަސައްކަތް ކުރައްވަމުން ގެންދަވާ، އިކޮނޮމިކް މިނިސްޓަރު ފައްޔާޒު އިސްމާޢީލް ހޮވުމަކީ ވަރަށް މުހިންމު ކަމެއްކަމުގައި އަޅުގަނޑު ދެކެން. ސަބަބަކީ ދެ ކެންޑިޑޭޓުން އަޅާކިޔާލާއިރު އަޅުގަނޑަށް ހަމަޔަގީނުންވެސް ފައްޔާޒު އިސްމާޢީލްގެ އެ ލީޑަރޝިޕް ހުރިކަން އެބަފެނޭ." އާތިފު ވިދާޅުވިއެވެ.

އޭނާ އިތުރަށް ވިދާޅުވީ، ފައްޔާޒާއި ބައްދަލުވެ ދެކެވުނު ވާހަކައިން، އޭނާއަކީ ޕާޓީ ހިންގާލެވޭނެފަދަ ލީޑަރެއްކަން ސާފުވިކަމަށެވެ. އެހެންކަމުން، ޗެއަރޕާސަންގެ އިންތިހާބުގައި ޕާޓީގެ ހުރިހާ މެންބަރުންވެސް ފައްޔާޒަށް ވޯޓު ދިނުމަށް އާތިފު ވަނީ އެދިވަޑައިގެންފައެވެ.

މި ހިނގާ މެއި މަހުގެ 14 ވަނަ ދުވަހު ބާއްވާ މި އިންތިހާބު ވެގެންދާނީ އެމްޑީޕީގެ ތާރީހުގައި ވެސް އެންމެ ފޯރިގަދަކޮށް ކުރިޔަށްދާނެ އެތެރޭގެ އިންތިހާބަށެވެ. ޕާޓީގައި އުފެދިފައިވާ ރައީސް ނަޝީދުގެ ފެކްޝަނުންނާއި ރައީސް ޞާލިޙްގެ ފެކްޝަނުންވެސް މި އިންތިޚާބަށް ކެންޑިޑޭޓުން ނެރެފައިވާއިރު، ސިޓީ ކައުންސިލްތަކާއި އަތޮޅު ކައުންސިލްތައް އަދި ގިނަ ރަށު ކައުންސިލްތަކުގެ އެމްޑީޕީގެ އިސް ފަރާތްތަކުގެ ތާއީދު އޮތީ ފައްޔާޒަށްކަން އެފަރާތްތަކުން ދަނީ ހާމަކުރަމުންނެވެ.