މޯލްޑިވްސް ބްރޯޑްކާސްޓިން އެވޯޑަށް ކުރިމަތިލުމުގެ ފުރުސަތު ބްރޯޑްކާސްޓިން ކޮމިޝަނުން ހުޅުވާލައިފިއެވެ.

ބޮރޯޑްކޮމް އިން ބުނެފައިވަނީ މިއެވޯޑް ދިނުމުގެ މަޤްސަދަކީ ދިވެހިރާއްޖޭގައި ޚިޔާލުފާޅުކުރުމުގެ މިނިވަންކަމާއި ޑިމޮކްރަސީ އާލާކޮށް ދަމަހައްޓާ އަދި ޤައުމު ބިނާކުރުމާއި، އެކި ދާއިރާތަކުން ރައްޔިތުންގެ ހޭލުންތެރިކަން އިތުރުކޮށް މަޢުލޫމާތު މުއްސަނދި ކުރުމުގައި ބްރޯޑްކާސްޓިންގ ސިނާއަތުގައި ހަރަކާތްތެރިވާ ފަރާތްތަކުން އަދާކުރާ މުހިއްމު ދައުރުގެ އަގުވަޒަންކުރުން ކަމަށެވެ.

ހަމައެއާއެކު ބްރޯޑްކާސްޓިންގެ ސިނާޢަތުގެ ތަރައްޤީއަށް މަގުފަހިކޮށް ހިތްވަރު ދިނުމަކީވެސް މި އެވޯޑް ތަޢާރަފްކުރުމުގެ މަޤްސަދެއްކަމަށް ބްރޯޑްކޮމް އިން ވަނީ ބުނެފައެވެ. އެހެންކަމުން މޯލްޑިވްސް ބްރޯޑްކާސްޓިންގ ކޮމިޝަނުން ވަނީ މޯލްޑިވްސް ބްރޯޑްކާސްޓް އެވޯޑްގައި ހިމެނޭ ކެޓަގަރީތަކަށް ކުރިމަތިލުމުގެ ފުރުޞަތު އާންމުކޮށް ހުޅުވާލާފައެވެ.

އިޢުލާން - "މޯލްޑިވްސް ބްރޯޑްކާސްްޓް އެވޯޑް 2022" އަށް ކުރިމަތިލުމުގެ ފުރުޞަތު ހުޅުވާލުންhttps://t.co/Z5vZlHAH9L pic.twitter.com/It0AIQvbV7

— MVbroadcom (@broadcomMV) May 3, 2022

މި އެވޯޑްގައި ޕްރޮޑަކްޝަން، ނޫސްވެރިކަން އަދި އިންޑަސްޓްރީ ހިމެނޭހެން ތިން ބަޔަކަށް ބަހާލައިގެން ޖުމްލަ 21 ދާއިރާއަކުން އެވޯޑް ދިނުމަށް ވަނީ ހަމަޖެހިފައެވެ. އެވޯޑަށް ކުރިމަތިލެވޭނީ މޯލްޑިވްސް ބްރޯޑްކާސްޓިން ކޮމިޝަނުން ލައިސަންސް ދޫކޮށްފައިވާ ބްރޯޑްކާސްޓަރުންނަށެވެ. އަދި، ނޫސްވެރިއެއް ނުވަތަ އަމިއްލަ ފަރާތަކުން ކުރިމަތިލާނަމަ ކޮމިޝަނުން ލައިސަންސް ދޫކޮށްފައިވާ ބްރޯޑްކާސްޓަރަކާ އެއްކޮށް ކޮށްފައިވާ މަސައްކަތަކަށް ނުވަތަ ބްރޯޑްކާސްޓް ކޮށްފައިވާ ކޮންޓެންޓަކަށްވާން ޖެހެއެވެ.

ބްރޯޑްކޮމުން ބުނީ މި އެވޯޑަށް އެދި ހުށަހަޅާ ހުށަހެޅުންތަކަކީ އެކެއް ޖެނުއަރީ 2017 އިން ފެށިގެން 31 ޑިސެމްބަރު 2021އާއި ދެމެދު ބްރޯޑްކާސްޓް ކޮށްފައިވާ ޑޮކިއުމެންޓްރީއަކަށް ވާންވާނެ ކަމަށެވެ.

މޯލްޑިވްސް ބްރޯޑްކާސްޓިން އެވޯޑަށް ފޯމު ހުށަހެޅުމުގެ ފުރުސަތު ހުޅުވާލާފައި ވަނީ ޖޫން 2 ވަނަ ދުވަހުގެ މެންދުރު 2:00 ގެ ނިޔަލަށެވެ.