އިދިކޮޅު ލީޑަރ އަދި ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމްގެ ފުރަތަމަ ޓްވިޓާ ހެންޑަލް ބޭނުންކުރައްވަން ފައްޓަވައިފިއެވެ.

އާންމުގޮތެއްގައި މީސްމީޑިއާއާއި ވަރަށް ދުރުގައި އުޅުއްވާ ބޭފުޅެއްގެ ގޮތުގައި ފާހަގަ ކުރެވިފައިވާ ރައީސް ޔާމީން ޓްވިޓާއަށް ވަންނަވަން ފެއްޓެވިކަން އެމަނިކުފާނު ނިސްބަތްވެވަޑައިގަންނަވާ ޕީޕީއެމުން ރަސްމީކޮށް މިރޭ ވަނީ އިއުލާނު ކޮށްފައެވެ.

ޕީޕީއެމުން ވަނީ ޢަބްދުﷲ ޔާމީންގެ ނަމުގައިވާ އެ އެކައުންޓަކީ ރައީސް ޔާމީންގެ އެކައުންޓެއްކަން ކަށަވަރުކޮށްދީ، އެ އެކައުންޓު ވީހާވެސް ގިނަ ބަޔަކު ފޮލޯ ކުރުމަށް އެދިފައެވެ. މިރޭ އެމަނިކުފާނު ޓްވިޓާއަށް ވަންނަވަން ފެއްޓުވުމުގެ ގޮތުން އެ ހެންޑްލުން ފުރަތަމަވެސް ޓްވީޓް ކުރެއްވީ ޤައުމީ ދިދައެއްގެ ފޮޓޯއެކެވެ. އަދި ފޮޓޯގެ ކެޕްޝަނަކަށް ދިވެއްސަކަށް ވީތީ ފަހުރުވެރިވާކަމަށް ލިޔުއްވާފައިވެއެވެ.

ދެހާސް ތޭރަވަނަ އަހަރުގެ ރިޔާސީ އިންތިހާބު ކާމިޔާބު ކުރައްވާ ރާއްޖޭގެ ވެރިކަން ފަސް އަހަރު ދުވަހު ކުރެއްވިއިރު ވެސް ރައީސް ޔާމީނަކީ ޓްވީޓާ ނުވަތަ ސޯޝަލް މީޑިއާގެ އެހެން އެއްވެސް ވަސީލަތެއް ބޭނުން ކުރެއްވި ބޭފުޅެއް ނޫނެވެ.

ރައީސް ޔާމީން ޓްވިޓާ ބޭނުން ކުރައްވަން ފައްޓަވާފައި މިވަނީ، ކުރިޔަށް އޮތް 2023 ގެ ރިޔާސީ އިންތިހާބަށް މުޅި ރާއްޖެވެސް ތައްޔާރުވަމުން ދާ ދަނޑިވަޅެއްގައެވެ. ޓްވިޓާއަކީ މުޅި ދުނިޔޭގައިވެސް އެންމެ ނުފޫޒުގަދަ ބޭފުޅުން އެންމެ ގިނައިން ބޭނުންކުރައްވާ މީސްމީޑިއާ ޕްލެޓްފޯމެވެ. އަދި އާންމުކޮށް ވަރަށް ގިނަ ސިޔާސީ ބޭފުޅުން ބޭނުން ކުރަށްވާ ވެސް ޕްލެޓްފޯމެކެވެ.