މިދުވަސްވަރު މާލެތެރޭގައި ވަޅިޖެހުން އިތުރުވެފައިވާތީ، ކުރީގެ ރައީސް ޢަބްދުﷲ ޔާމީން ޢަބްދުލް ގައްޔޫމް ކަންބޮޑުވުން ފާޅު ކުރައްވައިފިއެވެ.

ރައީސް ޔާމީން ޓްވިޓާ ބޭނުންކުރައްވަން ފެއްޓެވިފަހުން ގައުމުގެ ކަންކަމާއި ގުޅޭގޮތުން މިއަދު ކުރެއްވި ފުރަތަމަ ޓްވީޓްގައި ވިދާޅުވީ، ގިނަ ދުވަސްތަކަކަށްފަހު އަނެއްކާވެސް ވަޅި ޖެހުމާއި ނުރައްކާތެރި ކުށްތައް އާންމުވެފައިވާ ކަމަށެވެ. އަދި އެއީ ފުލުހުން އެކަންކަމާއިމެދު އަޅާނުލާތީ ތޯ ނުވަތަ އެކަންކަމަށް ފުލުހުން ހިތްވަރުދޭތީ ތޯ ރައީސް ޔާމީން ވަނީ ސުވާލު ކުރައްވާފައެވެ.

ރައީސް ޔާމީން މިފަދައިން ވިދާޅުވެފައި މިވަނީ، ފާއިތުވި ދެތިން ދުވަސް ތެރޭގައި މާލެ ސަރަހައްދުގައި ތޫނު ހަތިޔާރު ބޭނުންކޮށްގެން ގިނަ މާރާމާރީތަކެއް ހިންގާފައި ވަނިކޮށެވެ. މިގޮތުން އިއްޔެ އެކަނިވެސް ވަޅި ޖެހުމުގެ ތިން ހާދިސާ ހިނގާފައިވެއެވެ.

Brutal stabbings n violent crimes showing its ugly head after a long spell. Police indifference? O is it in deference 😁

— Abdulla Yameen (@prz_ymn) May 5, 2022

އެގޮތުން، ރޭ ހުޅުމާލޭގައި ހިންގި ދެ މާރާމާރީއެއްގައި ބަޔަކު ވަނީ ހުޅުމާލޭ ދެވަނަ ފިޔަވަހީގައި ހުންނަ 12 ވަނަ ޓަވަރަށް ވަދެ ފިލަން މަސައްކަތްކޮށްފައެވެ. ނަމަވެސް ފުލުހުން ވަނީ ރޭ އެ ޓަވަރު ބަލައި ފާސްކޮށް ފަސްމީހަކު ހައްޔަރުކޮށްފައެވެ.

އެ މާރާމާރީތަކާއި ގުޅިގެން ފުލުހުންވަނީ އެފަރާތްތައް ހޯދަން އާންމުންގެ އެހީތެރިމަށް ވެސް އެދިފައެވެ.